Social Economic Newspapers Online

ລາວ​ມີ​ບໍ­ລິ­ສັດ​ບຳ­ລຸງ​ສ້ອມ­ແປງ​ເຮືອບິນ​ມາດ­ຖານ​ສາ­ກົນ

Date of News ວັນທີ 12/03/2014 - ເວລາ 10:23:21 ເບິ່ງ 168

ລາວ​ມີ​ບໍ­ລິ­ສັດ​ບຳ­ລຸງ​ສ້ອມ­ແປງ​ເຮືອບິນ​ມາດ­ຖານ​ສາ­ກົນ

 

ລັດ​ວິ​ສາ​ຫະ​ກິດ​ການ­ບິນ​ລາວ ແລະ ບໍ­ລິ­ສັດ TIC ຮ່ວມ​ທຶນ​ກັນ​ກວ່າ 20 ຕື້​ກີບ ຈົດ​ທະ­ບຽນ​ໃນ​ເບື້ອງ​ຕົ້ນ​ສ້າງ­ຕັ້ງ​ບໍ­ລິ­ສັດ​ວິ­ສະ­ວະ­ກຳ​ສາຍ​ການ­ບິນ​ລາວ ຈຳ­ກັດ ເພື່ອ​ຍົກ​ຖາ­ນະ​ແຜນ​ບຳ­ລຸງ​ຮັກ­ສາ ແລະ ສ້ອມ­ແປງ​ເຮືອ­ບິນ​ຂອງ​ການ­ບິນລາວ​ໃຫ້​ໄດ້​ມາດ­ຕະ­ຖານ​ສາ­ກົນເປັນ​ຕົວຊ່ວຍ​ອັນ​ສຳ­ຄັນ​ທີ່​ຈະ​ສ້າງ​ຄວາມ​ເຊື່ອໝັ້ນ​ໃຫ້​ແກ່​ລູກ​ຄ້າ​ເມື່ອ​ມາ​ໃຊ້​ບໍ­ລິ­ການ    ຊຶ່ງ​ຈະ​ເລີ່ມ​ປະ­ຕິ­ບັດ​ງານ​ໃນ​ທ້າຍ​ອາ­ທິດ​ນີ້.

ເພື່ອ​ສ້າງ​ບໍ­ລິ­ສັດ​ດັ່ງ­ກ່າວ​ໃຫ້​ເປັນ​ຮູບ​ປະ​ທຳ​ໄດ້​ມີ​ການ​ເຊັນ​ສັນ­ຍາ​ສ້າງ­ຕັ້ງຮ່ວມ​ກັນ​ໃນ​ແລງ​ວັນ​ທີ 11 ມີ­ນາ​ຜ່ານ​ມາ ທີ່​ລັດ​ວິ​ສາ​ຫະ​ກິດ​ການ­ບິນ​ລາວ ນະ­ຄອນຫຼວງ​ວຽງ​ຈັນ ລະ­ຫວ່າງ​ທ່ານ ດຣ. ສົມ​ພອນ ດວງ​ດາ­ລາ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ການ­ບິນ​ລາວ​ກັບ​ທ່ານ Jos van Schaik ຜູ້­ອຳ­ນວຍ­ການ​ບໍ­ລິ­ສັດ TIC ພ້ອມ​ນີ້​ກໍ​ມີ​ທ່ານ ດຣ. ສັນ­ຕິ​ສຸກ ສິ​ມະ​ລາ​ວົງ ຫົວ­ຫນ້າ​ຫ້ອງ­ການ​ກະ­ຊວງໂຍ­ທາ​ທິ​ການ ແລະ ຂົນ­ສົ່ງ, ທ່ານ ຢາ​ກົວ ລໍ​ປາງ​ກາວ ຫົວ­ຫນ້າ​ກົມ​ການ­ບິນ​ພົນລະ​ເຮືອນ ຕະ­ຫຼອດ​ຮອດ​ພະ­ນັກ­ງານ​ວິຊາ​ການ​ທັງ​ສອງ​ຝ່າຍ​ເຂົ້າ​ຮ່ວມ.

ອີງ​ຕາມ​ຂໍ້​ມູນ​ຈາກ​ລັດ​ວິ​ສາ​ຫະ​ກິດການ­ບິນ​ລາວ​ແຈ້ງ​ໃຫ້​ຮູ້​ວ່າ: ການ​ລົງນາມ​ກັນ​ເທື່ອ​ນີ້​ແມ່ນ​ເພື່ອ​ເຮັດ​ໃຫ້​ແຜນບຳ­ລຸງ​ຮັກ­ສາ ແລະ ສ້ອມ­ແປງ​ເຮືອ­ບິນ ໃຫ້​ໄດ້​ມາດ­ຖານ​ສາ­ກົນ ແລະ ຫັນ​ເປັນ​ມື​ອາ­ຊີບ​ສາ­ມາດ​ເປັນ​ເຈົ້າ​ຕົນ​ເອງ​ໃນ ການ​ສ້ອມ­ແປງ ແລະ ບຳ­ລຸງ​ຮັກ­ສາ​ເຮືອບິນ​ຂອງ​ຕົນ​ຢູ່​ພາຍ​ໃນ​ປະ­ເທດ​ເພື່ອ​ກ້າວໄປ​ສູ່​ການ​ບໍ­ລິ­ການ​ສ້ອມ­ແປງລວມ​ທັງການ​ບຳ­ລຸງ​ຮັກ­ສາ​ເຮືອ­ບິນ​ໃຫ້​ແກ່​ສາຍການ­ບິນ​ອື່ນ​ໃນ­ຕໍ່­ໜ້າ ພ້ອມ​ທັງ​ສ້າງຄວາມ​ເຊື່ອ​ໝັ້ນ​ໃຫ້​ແກ່​ຜູ້­ໂດຍ­ສານ​ທີ່​ເຂົ້າມາ​ໃຊ້​ບໍ­ລິ­ການ​ຂອງ​ການ­ບິນ​ລາວ.

ການ​ຕົກ­ລົງ​ຮ່ວມ​ທຶນ​ສ້າງ­ຕັ້ງ​ບໍ­ລິ­ສັດ​ວິ­ສະ­ວະ­ກຳ​ສາຍ​ການ­ບິນ ຈຳ­ກັດ ມີ​ທຶນ​ຈົດ​ທະ­ບຽນ​ໃນ​ເບື້ອງ​ຕົ້ນ​ຈຳ­ນວນ 3 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 24 ຕື້​ກີບ ຊຶ່ງ​ລັດ​ວິ​ສາ​ຫະ​ກິດ​ການ­ບິນລາວ​ຖື​ຮຸ້ນ 51% ເປັນ​ຊັບ​ສິນ ສ່ວນ​ບໍ​ລິ ສັດ CIT ຖື​ຮຸ້ນ 49% ເປັນ​ເງິນ­ສົດ ໃນ​ກຳ­ນົດ​ການ​ຮ່ວມ​ທຶນ 10 ປີ ທັງ​ສາມາດ​ຕໍ່​ໄດ້ ແລະ ຈະ​ເລີ່ມ​ດຳ­ເນີນ​ງານ ຢ່າງ​ເປັນ​ທາງ​ການ​ນັບ​ແຕ່​ວັນ​ທີ 15 ມີນາ 2014 ນີ້​ເປັນ­ຕົ້ນ​ໄປ.

ແນວ­ໃດ​ກໍ​ດີ ຜ່ານ​ມາ​ການ­ບິນ​ລາວໄດ້​ຮັບ​ການ​ສະ­ໜັບ­ສະ­ໜູນ ແລະ ເອົາ­ໃຈໃສ່​ຈາກ​ລັດ­ຖະ­ບານ ກໍ​ຄື​ການ​ຊີ້​ນຳ​ຈາກກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ແລະ ພາກ­ສ່ວນ​ອື່ນໆ​ທີ່​ກ່ຽວ­ຂ້ອງ ຊຶ່ງໄດ້​ເຮັດ​ໃຫ້­ການ​ບິນ​ລາວ​ໄດ້​ຮັບ​ການ​ພັດທະ​ນາ​ຢ່າງ​ຕໍ່​ເນື່ອງ ໂດຍ​ໄດ້​ນຳ​ເອົາເຮືອບິນ​ຮຸ່ນ​ໃໝ່​ທີ່​ທັນ​ສະ­ໄໝ​ເຊັ່ນ: ATR 72Œ-500 ແລະ 600  ແລະ ເຮືອ­ບິນອາຍພົ່ນ​ຊະ­ນິດ Airbus 320 ເຂົ້າ​ມາຮັບ​ໃຊ້​ແຜນ​ທຸ­ລະ​ກິດ​ຂອງ​ຕົນ ເພື່ອ​ຂະຫຍາຍ​ການ​ຕະ­ຫຼາດ​ໃຫ້​ກວ້າງ­ຂວາງຂຶ້ນ.

ຄຳເຫັນຂອງທ່ານ:
ແຈ້ງ! ເຖິງຜູ້ອ່ານທຸກທ່ານທີ່ຕ້ອງການໃຫ້ຄໍາເຫັນໃນບົດ ຫລື ຂ່າວຂອງທາງເວັບໄຊພວກເຮົາ ກະລຸນາພິມເປັນພາສາລາວ ເພື່ອເປັນການເຂົ້າໃຈເຖິງຈຸດປະສົງຂອງທ່ານທີ່ຈະໃຫ້ຄໍາແນະນໍາຕ່າງໆ ແລະ ພວກເຮົາຈະສະແດງຂໍ້ຄວາມຂອງທ່ານອອກ ທາງຫນ້າເວັບໄຊ (ພາສາອື່ນໆພວກເຮົາຈະບໍ່ສະແດງໃນຫນ້າເວັບໄຊ)

ກະລຸນາລະບຸຂໍ້ຄວາມທີ່ສະແດງໃນຮູບຂ້າງເທິງ.
ຂໍ້ຄວາມເປັນຕົວພິມນ້ອຍ.