Social Economic Newspapers Online

ໄປອ່ານຫນັງສືຢູ່ເມືອງຫນັງສືໂລກ

Date of News ວັນທີ 29/04/2013 - ເວລາ 08:34:44 ເບິ່ງ 210

   ການ​ອ່ານຖື​ເປັນ​ຂະ​ບວນ​ການສຳ­ຄັນ​ໃນ​ການ​ຮຽນ​ຮູ້ ເພາະ​ເມື່ອອ່ານ­ຫນັງ­ສື​ແລ້ວ​ສະ­ຫມອງ​ກໍ່​ເກີດການ​ຮັບ​ຮູ້; ຄົ້ນ​ພົບ, ຄົ້ນ​ຄິດ, ຮູ້­ສຶກ; ສຳ­ນຶກ​ຢ່າງ​ມີ​ອິດ­ສະ­ຫລະ..

- ອ່ານ​ເພື່ອ​ສ້າງ​ຄວາມ​ຮັກ; ຮັກ ເຊື້ອ​ຊາດ, ຮັກ​ຕົນ​ເອງ, ຮັກ​ຄົນ ອື່ນ, ຮັກ​ໂລກ.

- ອ່ານ​ເພື່ອ​ຮັບ​ຮູ້; ຮູ້­ຈັກ​ຕົນ​ເອງ, ຮູ້​ຄົນ​ອື່ນ, ຮູ້​ໂລກ.

  - ເມື່ອ​ຮັກ ແລະ ຮັບ​ຮູ້​ກໍ່​ກ້າວ​ສູ່​ການ ສ້າງ­ສັນ​ພັດ­ທະ­ນາ​ຊີ­ວິດ ແລະ ສັງຄົມ​ໃຫ້​ຈະ­ເລີນ​ຮຸ່ງ­ເຮືອງ​ສ້າງ​ໂລກໃຫ້​ມີ​ສັນ­ຕິ­ພາບພົນ­ລະ­ເມືອງ​ໂລກ​ມີແຕ່​ຮອຍ​ຍິ້ມ.

ວັນ​ທີ 4-7 ເມ­ສາ ທີ່​ຜ່ານ​ມາ​ມີໂອ­ກາດ​ຮ່ວມ​ກັບ​ຄະ­ນະ​ຜູ້​ແທນ​ສະມາ​ຄົມ​ນັກ​ປະ­ພັນ​ລາວເດີນ­ທາງ​ໄປຮ່ວມ​ປະ­ຊຸມ​ນາໆຊາດ​ໄທ, ລາວ ແລະ ຫວຽດ­ນາມ ຢູ່​ບາງ­ກອກ​ປະເທດ​ໄທ.

   ການ​ເດີນ­ທາງ​ຄັ້ງ​ນີ້ ໄດ້​ໄປ​ງານສັບ­ປະ­ດາ​ຫນັງ­ສື​ແຫ່ງ​ຊາດ​ຄັ້ງ​ທີ 41 ຢູ່​ສູນ​ປະ­ຊຸມ​ແຫ່ງ​ຊາດສີ​ຣິ​ກິດ ເຊິ່ງໃນ​ໂອ­ກາດ​ນີ້ ກໍ່​ໄດ້​ຮັບ​ຮູ້​ເຖິງ​ການເປັນ​ເມືອງ​ຫນັງ­ສື​ໂລກ; ເມືອງ​ແຫ່ງການ​ອ່ານ​ຂອງ​ນະ­ຄອນ​ບາງ­ກອກໃນ​ປີ 2013.

    ກ່ອນ​ຊິ​ໄດ້​ເປັນ​ເມືອງ​ຫນັງ­ສື​ໂລກກໍ່​ຕ້ອງ​ຜ່ານ​ການ​ລົງ­ມະ­ຕິ​ຈາກ 4 ອົງ­ການ​ໃຫຍ່​ຂອງ​ໂລກ​ຄື: UNESCO; International Publishers Association (IPA); International Federation of Library Association and Institutions (IFLA) ແລະ International Booksellers Federation (IBF).

    ສຳ­ລັບ​ຄົນ​ຂຽນ​ຫນັງ­ສື​ແລ້ວ ຖື ເປັນ​ເລື່ອງ​ສຳ­ຄັນ​ຫລາຍ​ທີ່​ໄດ້​ເຂົ້າ ຮ່ວມ​ງານ​ນີ້ ເພາະ​ເຂົາ​ມີ​ປຶ້ມ​ຫລາຍ ຊະ­ນິດ​ວາງ​ຂາຍ​ໃນ​ລາ­ຄາ​ຫລຸດ​ລົງ ເກືອບ​ເຄິ່ງ​ຖ້າ​ທຽບ­ໃສ່​ລາ­ຄາ​ຂາຍ ປົກ­ກະ­ຕິ. ສະ­ນັ້ນ ໃນ​ຄະ­ນະ​ຜູ້​ແທນ​ຈິ່ງ ເຕືອນ​ກັນ​ເລື້ອຍໆ ເພາະ​ຢ້ານ​ວ່າ​ນ້ຳ ຫນັກ​ຈະ​ເກີນ​ເວ­ລາ​ກັບ​ບ້ານ ຍ້ອນ ຄະ­ນະ​ຜູ້​ແທນ​ພວກ​ເຮົາ​ເດີນ­ທາງ ດ້ວຍ​ສາຍ​ການ­ບິນ​ລາ­ຄາ​ຕ່ຳ.

   ໄດ້​ມີ​ການ​ພົບ​ປະ​ສົນ­ທະ­ນາ​ກັນລະ­ຫວ່າງ​ສະ­ມາ­ຄົມ​ນັກ​ປະ­ພັນ​ລາວ ແລະ ສະ­ມາ­ຄົມ​ນັກ​ຂຽນ​ແຫ່ງ​ປະເທດ​ໄທໃນ​ເລື່ອງ​ການ​ຮ່ວມ​ມື​ເຜີຍ ແຜ່​ຜົນ­ງານ​ດ້ານ​ວັນ­ນະ­ກຳ​ຂອງກັນ ແລະ ກັນ ເຊິ່ງ​ມີ​ການ​ເຮັດຂໍ້​ຕົກ­ລົງ​ຮ່ວມ​ກັນ​ໃນ​ການ​ຄັດເລືອກ​ຜົນ­ງານ​ຮ່ວມ​ສະ­ໄຫມ​ຂອງປະ­ເທດ​ຕົນ​ເອງ​ຄື: ເລື່ອງ­ສັ້ນ​ຈຳນວນ 5 ເລື່ອງ ແລະ ບົດ​ກອນຈຳ­ນວນ 10 ບົດ ທີ່​ສະ­ແດງເຖິງ​ສັງ­ຄົມ-ວັດ­ທະ­ນະ­ທຳ​ໂດຍລວມ; ແລ້ວ​ຈັດ​ພິມ​ຜົນ­ງານ​ເປັນສາມ​ພາ­ສາ​ຄື: ພາ­ສາ​ລາວ, ພາ­ສາໄທ ແລະ ອັງ­ກິດ. ໂຄງ­ການ​ນີ້ຈະ​ໃຫ້​ແລ້ວ​ໃນ​ປີ 2014 ໂດຍ​ແມ່ນຝ່າຍ​ໄທ​ສະ­ຫນັບ­ສະ­ຫນູນ​ດ້ານ​ທຶນຮອນ.

   ນອກ​ນັ້ນ, ພວກ​ເຮົາ​ຍັງ​ໄດ້​ເຂົ້າຮ່ວມ​ງານ​ຖະ­ແຫລງ​ຂ່າວ​ປຶ້ມ​ຜົນງານ​ຮ່ວມ​ສະ­ໄຫມ​ຂອງ​ນັກ​ປະ­ພັນຫວຽດ­ນາມ ແລະ ນັກ​ຂຽນ​ໄທ​ທີ່​ຈັດ ພິມ​ສຳ­ເລັດ​ໃນ​ຫົວ​ເລື່ອງ: “ດອກບົວ​ບານ​ໃນ​ທານ​ວັນ­ນະ­ກຳ” ພິມເປັນ​ສາມ​ພາ­ສາ​ຄື: ໄທ,  ຫວຽດນາມ, ອັງ­ກິດ ເຊິ່ງ​ປະ­ກອບ​ມີ​ເລື່ອງສັ້ນ​ປະ­ເທດ​ລະ 5 ເລື່ອງ ແລະ ບົດ​ກອນ 10 ບົດ; ໂຄງ­ການ​ນີ້​ກໍ່ແມ່ນ​ຝ່າຍ​ໄທ​ສະ­ຫນັບ­ສະ­ຫນູນ​ທຶນຮອນ.

   ຍ້ອນ​ວ່າ​ຜູ້​ຂຽນ ເປັນ​ຫນຶ່ງ​ໃນ​ຜູ້​ຊື້​ປຶ້ມ​ຫລາຍ​ຈິ່ງ​ຢາກ​ເວົ້າ​ເຖິງ​ການ ອ່ານ​ວ່າ​ດີ​ຫຍັງ​ແດ່? ເວົ້າ​ແບບ​ເຂົ້າ ໃຈ­ງ່າຍ​ແລ້ວ​ຖ້າ​ຢາກ​ຮູ້​ວ່າ​ຕົນ​ເອງ ສະ­ຫລາດ​ຫນ້ອຍ ຫລື ຫລາຍ​ໃຫ້​ອ່ານປຶ້ມ.. ອ່ານ­ຫນັງ­ສື​ຈະ​ຮູ້​ທັນ­ທີ​ໂລດ.

   ຕ້ອງ​ຍອມ­ຮັບ​ວ່າ​ສັງ­ຄົມ​ໃນ​ຍຸກໂລ­ກາ​ພິ​ວັດ​ປ່ຽນ­ແປງ​ຢ່າງ​ວ່ອງ­ໄວ ແລະ  ສະ­ຫລັບ­ຊັບ­ຊ້ອນ​ດ້ວຍ​ອິດ​ທິ​ພົນຂອງ​ເຕັກ​ໂນ​ໂລ​ຊີ; ແນວ​ຄິດ​ບໍ­ລິ­ໂພກນິ­ຍົມ ແລະ ວິ­ຖີ​ການ​ດຳ­ເນີນ​ຊີ­ວິດແບບ​ຕາ­ເວັນ­ຕົກ​ສ້າງ​ຜົນ​ກະ­ທົບຕໍ່​ຊີ­ວິດ​ຂອງ​ຄົນ​ໃນ​ສັງ­ຄົມ​ລາວ​ໃນຫລາຍ​ດ້ານ.

   ຄຳ​ຖາມ​ທີ່​ຕັ້ງ​ຂຶ້ນ​ສຳ­ລັບ​ສັງ­ຄົມລາວ​ນັ້ນ​ຄື: ເຮົາ​ຈະ​ດຳ­ເນີນ​ຊີ­ວິດ​ໃຫ້ເຂັ້ມ­ແຂງ​ຢ່າງ­ໃດ​ໃນ​ອະ­ນາ­ຄົດ​ຮູ້​ທັນກົນ​ລວງ ແລະ ໄດ້​ຮັບ​ຜົນ​ປະ­ໂຫຍດສູງ​ສຸດ​ຈາກ​ສັງ­ຄົມ​ຍຸກ​ໂລ­ກາ​ພິ​ວັດ.. ການ​ຮຽນ​ຮູ້​ດ້ວຍ​ການ​ອ່ານ​ເປັນຫນຶ່ງ​ໃນ​ຄຳ​ຕອບ​ທີ່​ສຳ­ຄັນ​ສຳ­ລັບ​ບັ້ງໂຈດ​ນີ້...

    ການ​ອ່ານ​ຄື​ການ​ພັດ­ທະ­ນາ​ຊີ­ວິດ

    READ FOR LIFE

 

ຄຳເຫັນຂອງທ່ານ:
ແຈ້ງ! ເຖິງຜູ້ອ່ານທຸກທ່ານທີ່ຕ້ອງການໃຫ້ຄໍາເຫັນໃນບົດ ຫລື ຂ່າວຂອງທາງເວັບໄຊພວກເຮົາ ກະລຸນາພິມເປັນພາສາລາວ ເພື່ອເປັນການເຂົ້າໃຈເຖິງຈຸດປະສົງຂອງທ່ານທີ່ຈະໃຫ້ຄໍາແນະນໍາຕ່າງໆ ແລະ ພວກເຮົາຈະສະແດງຂໍ້ຄວາມຂອງທ່ານອອກ ທາງຫນ້າເວັບໄຊ (ພາສາອື່ນໆພວກເຮົາຈະບໍ່ສະແດງໃນຫນ້າເວັບໄຊ)

ກະລຸນາລະບຸຂໍ້ຄວາມທີ່ສະແດງໃນຮູບຂ້າງເທິງ.
ຂໍ້ຄວາມເປັນຕົວພິມນ້ອຍ.