ຢ່າຫຼີ້ນກັບໄຟ

   ຄົນລາວບູຮານສອນວ່າງູ ໂຕນ້ອຍໆແຕ່ເປັນງູພິດກໍສາມາດຄົບຄົນຕາຍໄດ້ເຊັ່ນດຽວກັບໄຟເຖິງວ່າມັນຈະນ້ອຍເທົ່າກັບໄມ້ຂີດໄຟກ້ານດຽວແຕ່ກໍສາມາດຈູດເຜົາໂລກທັງໂລກ

ໄດ້, ເລື່ອງຂອງ ໄຟ ຈິ່ງມີທັງບວກ ແລະລົບ, ມີທັງ ຄຸນ ແລະ ໂທດຖ້າຍາມໃດຄົນທີ່ໃຊ້ ໄຟຂາດສະຕິປະໝາດໄຟນັ້ນກໍສາມາດສ້າງຄວາມເສຍຫາຍໃຫຍ່ຫຼວງໄດ້ທັງຄອບຄົວ ແລະໝູ່ບ້ານ, ມື້ກ່ອນອ່ານຂ່າວໜ້າເຟຊບຸກ (FB) ເລື່ອງໄຟໄໝ້ກຸຕິວັດແຫ່ງໜຶ່ງຢູ່ເມືອງໂຂງຈິ່ງຢາກໃຫ້ທຸກຄົນມີສະຕິວ່າໄຟນັ້ນໄໝ້ໄດ້ທຸກບ່ອນທັງບ້ານ ແລະ ວັດ.

   ວັນທີ 23 ມີນາ 2017 ໄດ້ ອ່ານໜັງສືພິມວຽງຈັນໃໝ່ເຫັນແຈ້ງການຂອງກອງບັນຊາການປ້ອງກັນຄວາມສະຫງົບນະຄອນຫຼວງເລື່ອງການເພີ່ມທະວີປ້ອງກັນ, ສະກັດກັ້ນ ແລະຕ້ານອັກຄີໄພ ຜູ້ຂຽນຈິ່ງຂໍນຳມາສະເໜີຕື່ມ ໃຫ້ ຫຼາຍຄົນໄດ້ຮັບຮູ້ ແລະມີສະຕິນຳ ກັນວ່າດຽວນີ້ແມ່ນຍ່າງເຂົ້າລະດູແລ້ງ ອາກາດຮ້ອນແຮງເຮັດໃຫ້ເກີດອັກຄີໄພໄດ້ງ່າຍພວກເຮົາບໍ່ ຄວນປະໝາດໃນການໃຊ້ໄຟເຮັດ ອາຫານໃນເຮືອນຊານ ໂດຍສະ ເພາະໃນຂໍ້ແຈ້ງການດັ່ງກ່າວກໍໄດ້ ບອກແຈ້ງວ່າ: 1. ການນຳໃຊ້ໄຟຟ້າເຂົ້າໃນການຜະລິດ, ການດຳລົງຊີ ວິດປະຈຳວັນ ຫຼື ວຽກງານອື່ນ ຕ້ອງໄດ້ປະຕິບັດຕາມຂໍ້ກຳນົດ ຂອງບໍລິສັດໄຟຟ້າໄດ້ວາງອອກ, ກວດກາເອົາໃຈໃສ່ສາຍໄຟຟ້າ, ເຄື່ອງໃຊ້ໄຟຟ້າໃຫ້ຢູ່ໃນສະພາບ ສົມບູນ, ຖ້າເຫັນວ່າເກົ່າແກ່ເປ່ເພ ກໍຄວນປ່ຽນ, ກ່ອນອອກຈາກບ້ານ ຫຼື ເຂົ້ານອນຕ້ອງກວດກາເຄື່ອງ ໃຊ້ໄຟຟ້າ, ຖອດປັກສຽບ ຫຼື ມອດ ຟືນໄຟໃຫ້ລະອຽດ, 2. ໃຕ້ທູບ ທຽນໄຫວ້ພະສູດມົນຕ້ອງມີສະ ຕິ. 3. ຫ້າມຈູດຂີ້ເຫຍື້ອຊະຊາຍ. ມັນເປັນຕົ້ນເຫດອັກຄີໄພ, 4. ຫ້າມຈູດວັດຖຸທີ່ເປັນທາດແຕກທາດ ລະເບີດ, ໝາກກະໂພກ, 5. ຫ້າມເອົານຳ້ມັນເຊື້ອໄຟມາໄວ້ເຮືອນ, 6. ບັນດາສຳນັກງານອົງການ, ບໍລິສັດ, ຫົວໜ່ວຍທຸລະກິດອຳ ນາດການປົກຄອງທ້ອງຖິ່ນຕ້ອງເພີ່ມທະວີຄວາມເອົາໃຈໃສ່ໃນ ການຈັດຕັ້ງປ້ອງກັນເວນຍາມສະ ຖານທີ່ຕົນຮັບຜິດຊອບຢ່າງເຂັ້ມ ງວດ, ຖ້າເກີດອັກຄີໄພສາມາດ ໂທແຈ້ງ: 1190 ຫຼື 021 212 707.

   ເລື່ອງຂອງຟືນໄຟໃນຍາມແລ້ງປາກົດວ່າມີຂ່າວໄຟໄໝ້ທຸກປີເຖິງແມ່ນວ່າພວກເຮົາໄດ້ເອົາໃຈໃສ່ປານໃດກໍຕາມເພາະວ່າຍັງປາກົດມີຄົນທີ່ປະໝາດຂາດສະຕິທັງທີ່ເຈຕະນາ ຫຼື ບໍ່ເຈຕະນາເຊັ່ນວ່າ: ຍາມປີໃໝ່ມີການຊຸມແຊວດື່ມກິນຈົນມືນເມົາທຳໃຫ້ຫຼົງລືມໃນການເປີດ-ມອດໄຟທີ່ຕົນໃຊ້ແຕ່ງຢູ່ຄົວກິນເມື່ອມີທັງແຈ້ງການອອກມາຕັກເຕືອນຄືແນວນີ້ພວກເຮົາຄວນຊ່ວຍກັນປະຕິບັດຕັກເຕືອນລູກຫຼານໃຫ້ເອົາໃຈໃສ່ບໍ່ຖືເບົາໃນການໃຊ້ເຄື່ອງໃຊ້ໄຟຟ້າທຸກປະເພດເຖິງແມ່ນວ່າ: ໄຟໄໝ້ມີສີບເທື່ອບໍ່ທໍ່ນ້ຳຖ້ວມເທື່ອໜຶ່ງກໍຕາມແຕ່ໄຟໄໝ້ກໍເຮັດໃຫ້ຫຼາຍຄົນສູນເສຍຊັບສິນມີຄ່າທີ່ຫາມາໄດ້ດ້ວຍຢາດເຫື່ອແຮງກາຍ! ສະນັ້ນຕ້ອງມີສະຕິ ແລະ ຕັກເຕືອນລູກຫຼານໃຫ້ເອົາໃຈໃສ່ການໃຊ້ຟືນໄຟເຮັດເປັນນິດໄສເຮັດເປັນນິດໄສຈິ່ງຈະປອດໄພ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ