ຊຽງຂວາງແຂ່ງຂັນການໃຊ້ໄມໂຄຣຊັອບອັອບຟິສ ລະດັບໂລກ

     ສູນປະກັນຄຸນນະພາບການສຶກສາກະຊວງສຶກສາທິການ ແລະກີລາຮ່ວມກັບສູນໄອຊິທີ ແຂວງຊຽງຂວາງຈັດການແຂ່ງຂັນການນຳໃຊ້ໄມໂຄຣຊັອບອັອບຟິສ ລະດັບໂລກ ຊຶ່ງເປັນຮອບຄັດເລືອກລະດັບແຂວງໃຫ້ແກ່ນ້ອງນັກຮຽນ-ນັກສຶກສາຢູ່ແຂວງຊຽງຂວາງໃນວັນທີ 8 ເມສາ ຜ່ານມາທີ່ສູນໄອຊິທີຂອງແຂວງພາຍໃຕ້ການເປັນປະທານຂອງທ່ານນາງ ສາຍສະໝອນ ມັງໜໍ່ເມກ ຮອງຫົວໜ້າພະແນກສຶກສາທິການ ແລະກີລາແຂວງ.

 

     ທ່ານ ອ່ອນສີ ແກ້ວພັກດີ ໄດ້ ຂຶ້ນກ່າວລາຍງານຄວາມພ້ອມ ຂອງນັກຮຽນ-ນັກສຶກສາຂອງ ແຂວງຊຽງຂວາງທີ່ຈະເຂົ້າຮ່ວມ ແຂ່ງຂັນການນຳໃຊ້ໄມໂຄຣຊັອບ ອັອບຟິສ ລະດັບໂລກຄັ້ງນີ້ໃນ ເບື້ອງຕົ້ນມີນັກຮຽນ-ນັກສຶກສາ ຈາກພາກລັດ ແລະເອກະຊົນ, ວິທະ ຍາໄລອ້ອມຂ້າງແຂວງທັງພາກລັດ ແລະເອກະຊົນມາສະໝັກທັງໝົດ 40 ກວ່າຄົນ, ແຕ່ໃນທີ່ສຸດມີໜ້າເຂົ້າແຂ່ງຂັນຕົວຈິງພຽງ 20 ຄົນ, ຍິງ 9 ຄົນ, ເນື່ອງຈາກນັກຮຽນຈຳນວນໜຶ່ງບໍ່ຖືກກັບເງື່ອນໄຂ, ເພາະເງື່ອນໄຂຜູ້ທີ່ເຂົ້າແຂ່ງຂັນແມ່ນອາຍຸຢູ່ໃນເກນ 13-22 ປີເທົ່ານັ້ນ.

     ສໍາລັບວິຊາສອບເສັງປະກອບມີ: ໄມໂຄຣຊັອບອັອບຟິສ (ເວີດ, ເອັກແຊລ, ພາເວີພອຍ) ແຕ່ລະວິຊາໃຊ້ເວລາສອບທັງໝົດ 1 ຊົ່ວໂມງ, ໃນນັ້ນໄມໂຄຣຊັອບອັອບຟິສເວີດ 16 ຄົນ ຍິງ 9 ຄົນ, ເອັກແຊລຈຳນວນ 2 ຄົນ ແລະພາເວີພອຍ ຈຳນວນ 2 ຄົນ.

     ພາຍຫຼັງສອບເສັງສຳເລັດຜູ້ທີ່ຊະນະເລີດແຕ່ລະວິຊາຈະໄດ້ເຂົ້າໄປແຂ່ງຂັນຮອບຄັດເລືອກລະດັບປະເທດ ຊຶ່ງຈະຈັດຂຶ້ນຢູ່ນະຄອນຫຼວງວຽງຈັນໃນລະຫວ່າງເດືອນພຶດສະພາ 2017 ໜ້ານີ້, ຈາກນັ້ນ ຜູ້ທີ່ຊະນະເລີດຮອບຄັດເລືອກລະດັບປະເທດກໍຈະເປັນຕົວແທນໃຫ້ປະເທດລາວເດີນທາງໄປແຂ່ງຂັນ ຮອບສຸດທ້າຍລະດັບໂລກທີ່ປະເທດສະຫະລັດອາເມລິກາ ຊຶ່ງຈະຈັດຂຶ້ນໃນລະຫວ່າງເດືອນສິງຫາ 2017 ທີ່ຈະມາເຖິງນີ້.

     ທ່ານ ອ່ອນສີ ແກ້ວພັກດີ ຍັງກ່າວໃຫ້ຮູ້ອີກວ່າ: ຈຸດປະສົງຂອງ ການຈັດການແຂ່ງຂັນການນຳໃຊ້ໄມໂຄຣຊັອບອັອບຟິສ ລະດັບໂລກ ກໍເພື່ອເປັນການເປີດໂອກາດໃຫ້ໄວໜຸ່ມນັກຮຽນ-ນັກສຶກສາໄດ້ສະແດງ ອອກທາງດ້ານຄວາມຮູ້ຄວາມສາມາດການນຳໃຊ້ໄມໂຄຣ ຊັອບອັອບຟິສ, ໃຫ້ຄວາມສຳຄັນ, ໃຫ້ໂອກາດ ແລະໃຫ້ເວລາແກ່ເຂົາ ເຈົ້າໄດ້ກ້າວຂຶ້ນເປັນແຊັມປ໋ຽນລະດັບໂລກໃນອະນາຄົດ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ