ຫ້ອມສະຫວັນ ກວາດແຊ໋ມ 2 ຮຸ່ນປະກວດແຕ້ມຮູບລົດໂຕໂຢຕ້າໃນຝັນຂອງຂ້ອຍ 2017

     ນັກຮຽນຂອງໂຮງຮຽນ ຫ້ອມສະຫວັນສາມາດກວາດແຊ໋ມ ໄດ້ເຖິງ 2 ຮຸ່ນ ກໍຄືຮຸ່ນອາຍຸຕ່ຳກວ່າ 8 ປີ ແລະຮຸ່ນອາຍຸ 8-11 ປີ, ຂະນະທີ່ຮຸ່ນອາຍຸ 12-15 ປີ ແຊ໋ມຕົກເປັນຂອງໂຮງຮຽນສີສັດຕະນາກໃນໂຄງການປະກວດແຕ້ມ ຮູບລົດໂຕໂຢຕ້າໃນຝັນຂອງຂ້ອຍປະຈຳປີ 2017.

 

     ບ່າຍວັນທີ 1 ເມສາຜ່ານມາ ທີ່ສູນການຄ້າວຽງຈັນເຊັນເຕີນະຄອນຫຼວງວຽງຈັນ, ບໍລິສັດໂຕໂຢຕ້າມໍເຕີປະເທດໄທ ຈຳກັດ ໄດ້ຈັດພິທີປະກາດຜົນລາງວັນຊະນະເລີດ ແລະມອບລາງວັນກ່ຽວກັບໂຄງການປະກວດແຕ້ມຮູບລົດໂຕໂຢຕ້າ ໃນຝັນຂອງຂ້ອຍປະຈຳປີ 2017 ໂດຍເຂົ້າຮ່ວມ, ມີທ່ານ ຄຳຜາຍ ສີສະຫວັນ ຮອງລັດຖະມົນຕີກະ ຊວງສຶກສາທິການ ແລະກີລາ, ທ່ານ ປະກອນ ວົງວິທະຍາພິຣົມ ປະທານຝ່າຍປະຕິບັດການສາຍງານຍ່ອຍເຂດພູມິພາກແມ່ນ້ຳຂອງ ບໍລິສັດ ໂຕໂຢຕ້າ ມໍເຕີປະເທດໄທ ຈຳກັດ, ທ່ານ ມີທອງ ສຸວັນວິໄຊ ຫົວໜ້າກົມອະນຸບານ ແລະປະຖົມ ສຶກສາກະຊວງສຶກສາທິການ ແລະກີລາພ້ອມດ້ວຍບັນດາຫົວໜ້າ, ຮອງຫົວໜ້າກົມທີ່ກ່ຽວຂ້ອງ, ຕົວແທນຈຳໜ່າຍໂຕໂຢຕ້າຢ່າງເປັນທາງການໃນ ສປປ ລາວ ຄະນະກຳມະການຜູ້ຊົງຄຸນວຸດທິ, ຄູ, ອາຈານ, ພໍ່, ແມ່ຜູ້ປົກຄອງ ແລະນ້ອງນັກຮຽນຢ່າງຫຼວງຫຼາຍ.

     ໂອກາດດັ່ງກ່າວ, ທ່ານ ປະກອນ ວົງວິທະຍາພິຣົມ ກ່າວວ່າ: ໂຄງການປະກວດແຕ້ມຮູບລົດໂຕໂຢຕ້າໃນຝັນຂອງຂ້ອຍແມ່ນເປັນ ສ່ວນໜຶ່ງຂອງນະໂຍບາຍ “ໂຕໂຢຕ້າ ໄປໃສໄປນຳກັນ” ທີ່ໄດ້ສະໜັບສະໜູນສັງຄົມລາວໃນດ້ານການສຶກສາມາ ໂດຍຕະຫຼອດໂດຍໄດ້ເລີ່ມໂຄງການນີ້ມາແຕ່ປີ 2011 ແລະປີນີ້ເປັນປີທີ່ໄດ້ຜົນງານຫຼາຍທີ່ສຸດທີ່ເຄີຍມີມາກ່ອນສູງເຖິງ 4.660 ຮູບພາບທັງນີ້ກໍ່ຂໍສະແດງຄວາມຂອບໃຈແກ່ກະຊວງສຶກສາທິການ ແລະກີລາ, ພາກສ່ວນ ຕ່າງໆທີ່ກ່ຽວຂ້ອງໃນການສະໜັບສະໜູນໂຄງການນີ້.

     ໂຄງການປະກວດແຕ້ມຮູບ ໃນຫົວຂໍ້ “ລົດໂຕໂຢຕ້າໃນຝັນຂອງຂ້ອຍ” ແມ່ນໄດ້ຈັດຂຶ້ນເປັນ ຄັ້ງທີ 11 ໃນລະດັບສາກົນ ແລະໃນປີ 2017 ໄດ້ຈັດຂຶ້ນຢ່າງຍິ່ງ ໃຫຍ່ດ້ວຍການເປີດກວ້າງການປະກວດຂຶ້ນໃນທົ່ວປະເທດ ໂດຍໄດ້ ຮັບຄວາມສົນໃຈຈາກເຍົາວະຊົນ ແລະພໍ່-ແມ່ຜູ້ປົກຄອງເປັນຈຳນວນຫຼາຍ ຊຶ່ງມີຍອດລວມຜູ້ສະໜັກທັງ ໝົດ 4.660 ຄົນ ຈາກ 18 ແຂວງ ທົ່ວປະເທດ ແລະໄດ້ຮັບກຽດເປັນ ຄະນະກຳມະການຈາກກະຊວງ ສຶກສາທິການ ແລະກີລາ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ແລະກົມວິຈິດສິນແຫ່ງຊາດເພື່ອມາຄັດເລືອກຮູບແຕ້ມ ຈົນໄດ້ຜູ້ຊະນະເລີດໃນແຕ່ລະປະເພດອາຍຸ.

     ໃນນີ້, ຮຸ່ນອາຍຸຕ່ຳກວ່າ 8 ປີ ຊະນະເລີດແມ່ນນາງ ແກ້ວອຳ ພາ ສາຍສະຫວັນ ຈາກໂຮງຮຽນ ຫ້ອມສະຫວັນ, ອັນດັບທີ 2 ແມ່ນທ້າວ ຈິດຕະກອນ ໂພທິສານ ໂຮງຮຽນສອນແຕ້ມຮູບອິດເຕິນອາດ, ອັນດັບທີ 3 ແມ່ນທ້າວ ເກດສະໜາ ຈັນມາລາ ຈາກໂຮງຮຽນຫ້ອມສະຫວັນ ແລະລາງວັນຊົມເຊີຍແມ່ນນາງ ເມທິກອນ ສີສົມບັດ ຈາກໂຮງຮຽນຊ້າງນ້ອຍ ແລະທ້າວ ວິລະສັກ ສຸກສົມຫວັງ ຈາກໂຮງຮຽນຫ້ອມສະຫວັນ; ຮຸ່ນອາ ຍຸ 8-11 ປີ ຊະນະເລີດແມ່ນທ້າວ ຄຳພູ ສີຫາລາດ ຈາກໂຮງຮຽນ ຫ້ອມສະຫວັນ, ອັນດັບ ທີ 2 ແມ່ນທ້າວ ແອ່ນດີ້ ແກ້ວວົງສາ ຈາກ ໂຮງຮຽນຫ້ອມສະຫວັນ, ອັນດັບທີ 3 ແມ່ນທ້າວ ທັນວາ ດາລາສັກ ຈາກໂຮງຮຽນຫ້ອມສະຫວັນ ແລະ ລາງວັນຊົມເຊີຍແມ່ນນາງ ພິລິສາ ອິນທະວົງ ຈາກໂຮງຮຽນຫ້ອມສະຫວັນ ແລະທ້າວ ຊະນະສິນ ໂພທິສານ ໂຮງຮຽນສອນແຕ້ມຮູບອິດເຕິນອາດ, ສ່ວນຮຸ່ນອາຍຸ 12-15 ປີ ຊະນະເລີດແມ່ນນາງ ລັດຕະນາ ຈັນດາວົງ ຈາກໂຮງຮຽນສີ ສັດຕະນາກ, ອັນດັບທີ 2 ແມ່ນນາງ ນິດຕິພອນ ລິນທອງ ຈາກໂຮງຮຽນ ສິນໄຊ, ອັນດັບທີ 3 ແມ່ນ ນາງ ອາລີ ສີດາພອນ ໂຮງຮຽນສອນ ແຕ້ມຮູບອິດເຕິນອາດ ແລະລາງວັນ ຊົມເຊີຍແມ່ນນາງ ສຸກສະຫວັນ ມະນີ ວົງໄຊ ຈາກໂຮງຮຽນສີສັດຕະນາກ ແລະທ້າວ ເຈມບອນ ຈະເລີນສຸກ ຈາກໂຮງຮຽນຫ້ອມສະຫວັນ.

     ສຳລັບຜູ້ຊະນະເລີດໃນແຕ່ລະຮຸ່ນອາຍຸແມ່ນໄດ້ຮັບທຶນການສຶກສາ 5 ລ້ານກີບ ພ້ອມກັບຂັນລາງວັນ ແລະໃບຢັ້ງຢືນ ນອກຈາກນີ້, ທາງໂຕໂຢຕ້າຍັງໄດ້ເພີ່ມລາງວັນພິເສດເປັນແພັກເກັດໄປທັດສະນະສຶກສາທີ່ນະຄອນຫຼວງບາງກອກ ປະເທດໄທພ້ອມຜູ້ປົກຄອງ 1 ທ່ານ ເປັນເວລາ 2 ມື້ 1 ຄືນ ຊຶ່ງຈະເປັນໂອ ກາດທີ່ນ້ອງໆຈະໄດ້ໄປທ່ຽວຊົມຫໍພິ ພິທະພັນສິລະປະຂອງປະເທດໄທ ເພື່ອເປັນແຮງບັນດານໃຈໃນການ ສ້າງຜົນງານຄັ້ງຕໍ່ໄປໃນອະນາ ຄົດ, ສ່ວນໂຮງຮຽນທີ່ສົ່ງເຂົ້າ ຮ່ວມແມ່ນໄດ້ທຶນສະໜັບສະໜູນ 5 ລ້ານກີບ, ອັນດັບທີ 2 ແມ່ນໄດ້ ຮັບທຶນການສຶກສາ 4 ລ້ານກີບ ພ້ອມຂັນ ແລະໃບຢັ້ງຢືນສ່ວນໂຮງ ຮຽນທີ່ສົ່ງເຂົ້າຮ່ວມກໍ່ໄດ້ຮັບທຶນ ສະໜັບສະໜູນ 4 ລ້ານກີບ, ອັນ ດັບທີ 3 ແມ່ນໄດ້ຮັບທຶນການສຶກສາ 3 ລ້ານກີບ ພ້ອມຂັນ ແລະໃບຢັ້ງຢືນ, ສ່ວນໂຮງຮຽນທີ່ສົ່ງເຂົ້າຮ່ວມກໍໄດ້ທຶນສະໜັບສະໜູນ 3 ລ້ານກີບ ແລະລາງວັນຊົມເຊີຍ ແມ່ນໄດ້ຮັບທຶນການສຶກສາຜູ້ລະ 1 ລ້ານກີບ, ສ່ວນໂຮງຮຽນທີ່ສົ່ງເຂົ້າຮ່ວມກໍໄດ້ທຶນສະໜັບສະໜູນແຫ່ງລະ 1 ລ້ານກີບເຊັ່ນກັນ.

     ນອກຈາກນີ້, ຜົນງານຂອງຜູ້ ທີ່ໄດ້ຮັບລາງວັນ 1,2,3 ໃນແຕ່ຮຸ່ນອາຍຸຈະຖືກສົ່ງໄປເຂົ້າຮ່ວມປະກວດໃນລະດັບໂລກທີ່ປະເທດຍີ່ປຸ່ນ ຊຶ່ງຈະໄດ້ປະກາດລາງວັນໃນເດືອນກໍລະກົດ 2017 ແລະຫາກຜົນງານຕິດອັນດັບ 1 ໃນ 3 ກໍຈະໄດ້ເດີນທາງໄປຮັບເອົາລາງວັນດ້ວຍຕົນເອງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ