ປະເພນີການຕົບພະຊາຍ

   ປະເພນີການຕົບພະຊາຍ ຫຼື ຕົບທາດຊາຍນັ້ນ, ແມ່ນຮີດຄອງປະເພນີທີ່ຄົນລາວຊາວພຸດພວກເຮົາເຄີຍໄດ້ປະຕິບັດສືບທອດກັນມາຕັ້ງແຕ່ບູຮານນະການ ໂດຍ ຄຽງຄູ່ໄປກັບ

ການເຮັດບຸນປີໃໝ່ລາວກໍຄືບຸນກຸດສົງການນັ້ນເອງຊຶ່ງຂະນະທີ່ກຳລັງເຮັັດບຸນປີໃໝ່ລາວນັ້ນ, ເພິ່ນກໍໄດ້ມີການຕົບພະຊາຍ ຫຼື ຕົບທາດຊາຍ, ຖ້າຫາກບ້ານໃດຕິດກັບແມ່ນ້ຳ ແລະຫ້ວຍ ຮ່ອງຄອງບຶງ ທີ່ມີຫາດຊາຍ ແລະ ໄດ້ນິມົນເອົາພະສົງສາມະເນນໄປພ້ອມເພື່ອປະກອບພິທີເຮັດບຸນຕາມພຸດທະສາສະໜາ.

   ຕາມການບອກເລົ່າຂອງພວກຜູ້ເຖ້ົາຜູ້ແກ່ ແລະ ອາວຸໂສທີ່ເຄີຍເຮັດບຸນສິນກິນທານຢູ່ຕາມວັດວາອາຮາມຕ່າງໆໄດ້ຮູ້ວ່າ: ການຕົບທາດຊາຍຢູ່ຫາດຊາຍ ຫຼື ຢູ່ວັດກໍເຮັດເໜືອນກັນ ຊຶ່ງເພິ່ນໄດ້ເຮັດກອງ ຊາຍໃຫ້ໃຫຍ່ ແລະ ສວຍງາມຕາມຄວາມຕ້ອງການ ແລະເຮັດເປັນ ຫຼາຍຮູບແບບເຊັ່ນ: ເຮັດໃຫ້ເປັນຮູບໝາກໂມຕັດເຄິິ່ງ, ເຮັດເປັນຮູບທາດຈອມແຫຼມ ແລະອື່ນໆ. ຈາກນັ້ນ, ເພິ່ນຈິ່ງໄດ້ຕົບທາດຊາຍນ້ອຍຫຼາຍລູກອ້ອມຮອບທາດຊາຍໃຫຍ່ນຳອີກແລ້ວກໍເອົາທຸງຊໍ່, ທຸງໄຊ ມາປະດັບປະດາ ແລະປັກໃສ່ຕາມ ທາດຊາຍນ້ອຍ-ທາດຊາຍໃຫຍ່ໃຫ້ງົດງາມແລ້ວກໍໄຫວ້ພະຮັບສິນຟັງເທດສະຫຼອງອີກຖືວ່າໄດ້ບຸນຫຼາຍ, ດຽວນີ້ບໍ່ຄ່ອຍຈະເຫັນເພິ່ນລົງໄປຕົບພະຊາຍທີ່ຫາດຊາຍເພາະວ່າການນຳເອົາຊາຍຈາກ ຫາດຊາຍຂຶ້ນມາຕົບທາດຊາຍຢູ່ທີ່ວັດເຫັນວ່າມີປະໂຫຍດທັງທາງຈິດໃຈ ແລະ ທາງວັດຖຸຄືສາມາດ ນຳເອົາຊາຍໄປສ້າງສາທາລະນະປະໂຫຍດໃຫ້ແກ່ວັດນຳອີກດ້ວຍ. ສະນັ້ນ, ພວກເພິ່ນຈິ່ງນິຍົມກັນລົງ ໄປຂົນເອົາຊາຍຢູ່ທີ່ຫາດຊາຍຂຶ້ນມາເຮັດເປັນກອງໃຫຍ່ໄວ້ທີ່ເດີ່ນວັດເພື່ອໄວ້ໃຫ້ອອກຕົນຍາດໂຍມຜູ້ທີ່ມີໃຈສັດທາທັງຫຼາຍຊຶ່ງມີທັງຍິງທັງຊາຍ, ຜູ້ເຖົ້າ ແລະ ຜູ້ໜຸ່ມມາ ຕົບທາດຊາຍຢູ່ຮົ່ມກົກໂພທີ່ວັດຢ່າງເປັນຂະບວນຟົດຟຶ້ນຫຼັງຈາກຕົບທາດຊາຍແລ້ວເພິ່ນກໍໄດ້ຖວາຍທາດຊາຍນັ້ນໃຫ້ແກ່ວັດເລີຍເພື່ອເປັນການສ້າງສາທາລະນະປະໂຫຍດໃຫ້ແກ່ວັດຕໍ່ໄປ.

   ເມື່ອເຮົາມາຄົ້ນຄວ້າ ແລະ ນຶກຄິດຢ່າງຖີ່ຖ້ວນເບິ່ງແລ້ວເຫັນວ່າໃນສະໄໝບູຮານເຮົານັ້ນ, ເພິ່ນເຮັດຫຍັງກໍຕ້ອງມີຄວາມສາມັກຄີປອງດອງກັນເຮັດ, ມີຄວາມຮັກແພງກັນພ້ອມພາກັນເຮັດຢ່າງ ສະໜຸກສະໜານເໜືອນດັ່ງຄອບ ຄົວດຽວກັນ, ພວກເຮົາຄົນຮຸ່ນຫຼັງ ກໍຄວນຖືເອົາເປັນບົດຮຽນ, ນຳຮອຍເກົ່າຂອງເພິ່ນຕາມຮີດຄອງ ເດີມກໍຈະດີໄປໜ້າ ແລະສາສະໜາ ກໍຈະບໍ່ເສົ້າໝອງສຳລັບປີນີ້ເດ, ພວກທ່ານໄດ້ກຽມພ້ອມແລ້ວບໍທາງດ້ານແຮງງານ, ວັດຖຸ ແລະ ຈິດໃຈເຂົ້າໃນກິດຈະກຳຕົບທາດຊາຍເພື່ອສ້າງບຸນກຸສົນຮ່ວມກັນທັງເປັນການສ້າງສາທາລະນະປະໂຫຍດຕ່າງໆນຳອີກດ້ວຍ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ