ລາວສົ່ງອອກຜະລິດຕະພັນພືດໄດ້ຫຼາຍຕື້ໂດລາ

     ໃນລະຫວ່າງວັນທີ 20-21 ເມສາ 2017 ທີ່ກະຊວງກະສິກໍາ ແລະປ່າໄມ້ ໄດ້ຈັດກອງປະຊຸມເພື່ອສະຫຼຸບ ແລະປຶກສາຫາລືກ່ຽວກັບການພັດທະນາກະສິກໍາສະອາດຕິດພັນກັບຂະແໜງການປູກຝັງໃນໄລຍະຜ່ານມາ ແລະທິດທາງແຜນການຕໍ່ໜ້າ ພ້ອມທັງເປີດວາງສະແດງສິນຄ້າກະສິກໍາສະອາດ,

ໂດຍການເປັນປະທານຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະປ່າໄມ້, ມີທ່ານຮອງລັດຖະມົນຕີ, ຫົວໜ້າ, ຮອງຫົວໜ້າພະແນກກະສິກໍາ ແລະປ່າໄມ້ແຂວງ ແລະນະຄອນຫຼວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

     ທ່ານ ລຽນ ທິແກ້ວ ກ່າວວ່າ: ກະສິກໍາສະອາດ ຖືເປັນແນວທາງນະໂຍບາຍໄລຍະໃໝ່ຂອງ ສປປ ລາວ, ພາກພື້ນ ແລະສາກົນຊຶ່ງເປັນລະບົບການຜະລິດ ທີ່ຄໍານຶງເຖິງການນໍາໃຊ້ຊັບພະຍາກອນທໍາມະຊາດແບບຍືນຍົງ, ເປັນການຜະລິດສະໜອງອາຫານສະອາດໃຫ້ແກ່ສັງຄົມ, ກະຊວງກະສິກໍາ ແລະປ່າໄມ້ໄດ້ເອົາໃຈໃສ່ຊີ້ນໍາບັນດາກົມທີ່ກ່ຽວຂ້ອງໃນການຈັດຕັ້ງນະໂຍບາຍກະສິກໍາສະອາດ, ໃນນັ້ນກົມປູກຝັງກໍເປັນກົມໜຶ່ງ ທີ່ມີບົດບາດຄວາມສໍາຄັນໃນການລິເລີ່ມຈັດຕັ້ງປະຕິບັດ ໂດຍສະເພາະແມ່ນໄດ້ສຸມໃສ່ການພັດທະນາກະສິກໍາສະອາດ ໃນ 2 ລະບົບຄື: ການຜະລິດກະສິກໍາອິນຊີ (OA) ແລະການຜະລິດກະສິກໍາທີ່ດີ (GAP), ແຕ່ເພື່ອເຮັດໃຫ້ການຜະລິດ ສະບຽງອາຫານ ແລະການຜະລິດກະສິກໍາສະອາດເປັນສິນຄ້າໄດ້ຮັບການພັດ ທະນາທາງດ້ານປະລິມານ ແລະຄຸນນະພາບນັ້ນ, ວຽກງານປ້ອງກັນ ແລະກັກກັນພືດ, ວຽກຄຸ້ມຄອງປັດໄຈການຜະລິດ ແລະຄຸ້ມຄອງເຕັກນິກການປູກຝັງ ກໍມີບົດບາດສໍາຄັນໃນການສະໜັບສະໜູນ ເປົ້າໝາຍດັ່ງກ່າວ.

     ແນວໃດກໍດີ ໃນປີ 2016 ຜ່ານມາຂະແໜງປູກຝັງ ໄດ້ປະກອບສ່ວນຕົ້ນຕໍ ເຂົ້າໃນລວມຍອດຜະລິດພາຍໃນຂອງ ຂະແໜງກະສິກໍາ ແລະປ່າໄມ້, ໂດຍມີມູນຄ່າການສົ່ງອອກພືດ ແລະຜະລິດຕະພັນພືດປະຕິບັດໄດ້ຫຼາຍກວ່າ 1 ຕື້ໂດລາສະຫະລັດ, ໃນນັ້ນ ພືດທີ່ມີທ່າແຮງສົ່ງອອກຫຼາຍແມ່ນສາລີແຂງ, ກາເຟ, ມັນຕົ້ນ, ໝາກກ້ວຍ, ໝາກໂມ, ເຂົ້າ ແລະພືດຜັກຕ່າງໆ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ