ໂຮງຂ້າສັດດອນດູ່ ສະໜອງຊິ້ນພຽງພໍທຸກເທສະການ

     ບໍລິສັດວິສາຫະກິດສະບຽງອາຫານກໍ່ຄື ໂຮງງານຂ້າສັດດອນດູ່ເມືອງຫາດຊາຍຟອງນະຄອນຫຼວງວຽງຈັນ ມີການພັດທະນາ ແລະຂະຫຍາຍຕົວໄວ້ໂດຍນຳເຄື່ອງຈັກທັນສະໄໝມື້ໜຶ່ງສາມາດຂ້າສັດຕອບສະໜອງຕະຫຼາດໄດ້ 200 ກວ່າໂຕ ພ້ອມເນັ້ນຊີ້ນມີຄຸນນະພາບປະຈຸບັນສາມາດຕອບສະໜອງຊີ້ໃຫ້ກັບຕະຫຼາດພຽງພໍໃນທຸກເທສະການ.

 

     ທ່ານ ຄຳຫຼ້າ ແສງດາລາຜູ້ອຳນວຍການບໍລິສັດ ລັດວິສາຫະກິດສະບຽງອາຫານນະຄອນຫຼວງວຽງຈັນ ໃຫ້ສຳພາດ ທີມຂ່າວເສດຖະກິດ-ສັງຄົມ ໃຫ້ຮູ້ວ່າ: ໂຮງງານຂ້າສັດດອນດູ່ຖືວ່າເປັນໂຮງງານໜຶ່ງທີ່ຕອບສະໜອງຊີ້ນໃຫ້ສັງຄົມກໍ່ຄື ຊາວນະຄອນຫຼວງວຽງຈັນ ທີ່ໄດ້ນຳເຄື່ອງມືທັນສະໄໝເຂົ້າມາໃຊ້ບໍລິການ ເພື່ອຕອບສະໜອງຄວາມຮຽກຮ້ອງຕ້ອງການຕະຫຼອດມາ.

     ປະຈຸບັນໂຮງງານໄດ້ກະກຽມຄວາມ ພ້ອມທຸກດ້ານແຕ່ລະມື້ ແລະເທສະການຕ່າງໆໃນການສະໜອງຊີ້ນໃຫ້ພຽງພໍ ຄວາມຕ້ອງການຂອງສັງຄົມເປັນຕົ້ນແຮງງານ ແລະສັດກຽມໄວ້ໂຮງງານພຽງພໍ ໂດຍສະເພາະປະເພດໝູ,ງົວ ແລະຄວາຍເພື່ອສະໜອງໃຫ້ແມ່ຄ້າຂາຍຊີ້ນຕາມທ້ອງຕະຫຼາດພາຍໃນນະຄອນຫຼວງວຽງຈັນ.

     ປະຈຸບັນທາງໂຮງງານຂ້າສັດດອນ ດູ່ສາມາດຂ້າສັດມື້ໜຶ່ງໄດ້ເຖິງ 200 ກວ່າໂຕເພື່ອເຮັດໃຫ້ການສະໜອງຊີ້ນ ທັນກັບຄວາມຕ້ອງການຂອງຜູ້ບໍລິໂພກໃນແຕ່ລະມື້ສຳລັບລາຄາໃນໂຮງງານງົວ, ຄວາຍ ໂລ 70 ພັນກີບ ແລະໝູ 40 ພັນກີບຕໍ່ກິໂລ.

     ໂຮງງານດອນດູ່ນອກຈາກຂ້າສັດສະໜອງແກ່ແມ່ຄ້າຈຳໜ່າຍໃຫ້ພໍ່ແມ່ປະຊາຊົນໄດ້ບໍລິໂພກແລ້ວ ຍັງຮັບບໍລິການ ຂ້າສັດທົ່ວໄປຕື່ມອີກ ສະນັ້ນ ຫາກພາກສ່ວນໃດທີ່ມີຄວາມຕ້ອງການກໍ່ສາມາດ ເຂົ້າພົວພັນໄດ້ ຊຶ່ງສຳນັກງານໃຫຍ່ຕັ້ງຢູ່ຖະໜົນສາມແສນໄທ ບ້ານສີຫອມ ຫຼື ຈະມາພົວພັນທີ່ໂຮງງານຢູ່ບ້ານດອນດູ່ ເມືອງຫາດຊາຍຟອງນະຄອນຫຼວງວຽງຈັນ ໂດຍເລີ່ມເປີດໃຫ້ແມ່ຄ້າ ຫຼື ບຸກຄົນມາໃຊ້ບໍລິການເລີ່ມແຕ່ເວລາ 3:00 ໂມງ ເຊົ້າຫາ 8:00 ໂມງທຸກໆມື້.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ