ກອງປະຊຸມສະພາແຫ່ງຊາດ ຈະເປີດຂຶ້ນທິດໜ້າ

     ວັນທີ 20 ເມສາຜ່ານມາທີ່ສະພາແຫ່ງຊາດ ທ່ານນາງ ສວນ ສະຫວັນ ວິຍະເກດ ກຳມະການຄະນະປະຈຳສະພາແຫ່ງຊາດ, ເລຂາທິການສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ຊຶ່ງຈະໄດ້ເປີດຂຶ້ນໃນວັນທີ 25 ເມສາ 2017 ທີ່ຫໍສະພາແຫ່ງຊາດ ນະຄອນຫຼວງວຽງຈັນ ແລະຈະດຳເນີນໄປຈົນຮອດວັນພະຫັດທີ 18 ພຶດສະພາ 2017 ລວມທັງໝົດ 17 ວັນ (ບໍ່ລວມວັນພັກລັດຖະການ).

 

     ທ່ານນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້ແມ່ນຈະໄດ້ຮັບຟັງການລາຍງານ, ພິຈາລະນາ ແລະຕົກລົງບັນຫາສຳຄັນຕ່າງໆ ໃນນັ້ນ ວຽກງານຂອງລັດຖະບານແມ່ນຈະໄດ້ຮັບ ຟັງລາຍງານໂດຍສັງເຂບຂອງທ່ານນາ ຍົກລັດຖະມົນຕີ ກ່ຽວກັບການຈັດຕັ້ງປະຕິບັດວຽກງານຈຸດສຸມໃນໄລຍະ 6 ເດືອນຜ່ານມາ ແລະທິດທາງໃນ 6 ເດືອນຕໍ່ໜ້າຂອງລັດຖະບານ 2017, ລາຍງານ ຂອງລັດຖະມົນຕີກະຊວງແຜນການ ແລະການລົງທຶນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໝົດປີ 2016 ແລະການຜັນຂະຫຍາຍຈັດຕັ້ງປະຕິບັດແຜນປີ 2017, ລາຍງານຂອງກະຊວງການເງິນ ກ່ຽວກັບບົດສະຫຼຸບສະພາບການປະຕິບັດແຜນງົບປະມານແຫ່ງ ລັດ 3 ເດືອນຂ້າມຜ່ານທ້າຍປີ 2016, ແຜນງົບປະມານແຫ່ງລັດງວດ 1 ປີ 2017 ແລະຄາດຄະເນທິດທາງ
6 ເດືອນຕົ້ນປີ 2017, ຮັບຟັງລາຍງານຂອງກະຊວງອຸດສາຫະກຳ ແລະການຄ້າກ່ຽວກັບສະພາບການຄຸ້ມຄອງລາຄາສິນຄ້າ, ອັດຕາເງິນເຟີ້, ອັດຕາແລກປ່ຽນທີ່ ພວມກະທົບຕໍ່ການຜະລິດ, ການດຳລົງຊີວິດຂອງສັງຄົມ, ທິດທາງ ແລະມາດຕະການແກ້ໄຂໃນຕໍ່ໜ້າ.

     ນອກນີ້ ກໍຈະໄດ້ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2012-2016) ແລະທິດ ທາງ 5 ປີ (2017-2021) ຂອງອົງການກວດສອບແຫ່ງລັດ, ພິຈາລະນາຮັບຮອງເອົາການເລືອກຕັ້ງປະທານອົງການກວດສອບແຫ່ງລັດ, ຮັບຟັງລາຍງານ ຂອງອົງການໄອຍະການປະຊາຊົນສູງສຸດກ່ຽວກັບການປະຕິບັດສິດສັ່ງຟ້ອງຄະດີອາຍາຂຶ້ນສານ ແລະການເຂົ້າຮ່ວມດຳເນີນຄະດີແພ່ງຢູ່ທີ່ປະຊຸມສານໃນໄລຍະຜ່ານມາ ແລະກຳນົດທິດທາງໃນການປັບປຸງຍົກສູງຄຸນນະພາບກ່ຽວກັບວຽກງານດັ່ງກ່າວ, ຮັບຟັງລາຍງານ ຂອງສານປະຊາຊົນສູງສຸດກ່ຽວກັບການດຳເນີນຄະດີຢູ່ສານຂັ້ນຕົ້ນ ແລະສານອຸທອນໄລຍະຜ່ານມາ, ທິດທາງປັບປຸງ ແລະຍົກສູງຄຸນນະພາບໃນວຽກງານດັ່ງກ່າວ.

     ພິຈາລະນາຮັບຮອງເອົາບົດລາຍງານການເຄື່ອນໄຫວຂອງຄະນະປະຈຳສະພາແຫ່ງຊາດລະຫວ່າງສອງກອງປະຊຸມສະພາແຫ່ງຊາດ, ແຕ່ລະກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາ ມັນເທື່ອທີ 3 ແລະແຜນການ ເຄື່ອນໄຫວວຽກງານແຕ່ລະກອງປະຊຸມສະໄໝສາມັນເທື່ອທີ 3 ຫາກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII, ພິຈາລະນາຮັບຮອງເອົາການສະເໜີແຕ່ງຕັ້ງຮອງປະທານກຳມາ ທິການຂອງສະພາແຫ່ງຊາດ ຕາມການສະເໜີຂອງຄະນະປະຈຳສະພາແຫ່ງຊາດ, ຮັບຟັງການຊີ້ແຈງຂອງພາກສ່ວນທີ່ກ່ຽວຂ້ອງຕໍ່ຄຳສະເໜີຂອງສັງຄົມ ຜ່ານໂທລະສັບສາຍດ່ວນຂອງກອງປະຊຸມສະໄໝສາມັນຂອງສະພາແຫ່ງຊາດຊຸດທີ VIII.

     ພ້ອມດຽວກັນນີ້ ຍັງຈະໄດ້ພິຈາລະນາຮັບຮອງເອົາກົດໝາຍສ້າງໃໝ່, ກົດໝາຍສະບັບປັບປຸງ ແລະປະກອບຄຳເຫັນ ໃສ່ກົດໝາຍທາບທາມລວມທັງໝົດ 14 ສະບັບ ໃນນີ້ ກົດໝາຍສ້າງໃໝ່ 5 ສະບັບ ມີກົດໝາຍຂົງເຂດເສດຖະກິດ-ການເງິນ 2 ສະບັບ, ການປົກຄອງ ແລະຍຸຕິທຳ 2 ສະບັບ, ວັດທະນະທຳ-ສັງຄົມ 1 ສະບັບ, ກົດໝາຍປັບປຸງມີ 8 ສະບັບ ຂົງເຂດການປົກຄອງ ແລະຍຸຕິທຳ 5 ສະບັບ, ເສດຖະກິດ-ການເງິນ 3 ສະບັບ ແລະກົດໝາຍທາບທາມມີ 1 ສະບັບ.

     ໃນໄລຍະດຳເນີນກອງປະຊຸມດັ່ງກ່າວບັນດາທ່ານສາມາດສົ່ງຄຳຄິດເຫັນ ແລະຄຳສະເໜີໄປຍັງກອງປະຊຸມໄດ້ ໂດຍໂທລະສັບບໍ່ເສຍຄ່າໝາຍເລກ 156, ໂທລະສານ 021 452 627, ສົງເປັນຈົດໝາຍທາງໄປສະນີຕູ້ ປນ. 662 ແລະສົ່ງອີເມວ This email address is being protected from spambots. You need JavaScript enabled to view it..

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ