ຊຽງຂວາງ ຊຸກຍູ້ການຜະລິດບ້ານຜາແດງ

     ໃນວັນທີ 17 ເມສາ2017 ທ່ານ ສົມກົດ ມັງໜໍ່ເມກ ເຈົ້າແຂວງໆຊຽງຂວາງ ພ້ອມດ້ວຍຄະນະໄດ້ລົງຊຸກຍູ້ຊີ້ ນຳການຜະລິດເປັນສິນຄ້າເປັນຕົ້ນ ແມ່ນການປູກ-ການລ້ຽງຂອງປະຊາຊົນບ້ານຜາແດງ ເມືອງໝອກ ແຂວງຊຽງຂວາງ ແລະກໍ່ຖືກຕ້ອນຮັບຈາກຊາວກະສິກອນຢ່າງອົບອຸ່ນ.

 

     ຊຶ່ງກ່ອນອື່ນທ່ານໄດ້ສະແດງຄວາມ ດີໃຈ ຊົມເຊີຍປະຊາຊົນບ້ານຜາແດງທີ່ ອອກແຮງແຂ່ງຂັນການປູກຫຍ້າ, ລ້ຽງງົວຢ່າງເປັນຂະບວນຟົດຟື້ນ ນອກນີ້ ທ່ານຍັງໄດ້ຊີ້ນຳໃຫ້ບັນດາພະແນກການ ທີ່ກ່ຽວຂ້ອງເຂົ້າຊ່ວຍເຫຼືອທາງດ້ານເຕັກນິກຕ່າງໆໃຫ້ແກ່ປະຊາຊົນ.

     ໃນໂອກາດນີ້ທ່ານເຈົ້າແຂວງກໍ່ໄດ້ ໄປຢ້ຽມຊົມສວນຫຍ້າ ແລະການລ້ຽງງົວຂອງຄອບຄົວຕົວແບບຄອບຄົວຂອງທ້າວ ເຍ່ຍຈໍ່ລໍ່ ປະຊາຊົນບ້ານຜາແດງ ປະຈຸບັນຄອບຄົວຂອງ ທ້າວ ເຍ່ຍຈໍ່ລໍ່ ມີເນື້ອທີ່ປູກຫຍ້າ 35 ເຮັກຕາ ສາມາດ ຂາຍແກ່ນຫຍ້າໄດ້ 3 ໂຕນຕໍ່ປີ ມີງົວທັງໝົດ 120 ໂຕ ສາມາດຂາຍໄດ້ 20 ໂຕຕໍ່ປີ ລວມເງິນຈາກການຂາຍແກ່ນຫຍ້າ ແລະຂາຍງົວໄດ້ 200 ກວ່າລ້ານກີບຕໍ່ປີ ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນ ແລະເປັນຄອບຄົວຕົວແບບນຳອີກ.

     ໃນວັນຕໍ່ມາທ່ານເຈົ້າແຂວງໆຊຽງຂວາງ ພ້ອມດ້ວຍຄະນະກໍ່ໄດ້ໂອ້ລົມຊີ້ ນຳການນຳຫຼັກແຫຼ່ງຂອງເມືອງໝອກ ໂດຍໄດ້ຮັບຟັງການລາຍງານການພັດ ທະນາເສດຖະກິດ-ສັງຄົມຂອງເມືອງໝອກ ຈາກເຈົ້າເມືອງໆໝອກ ຈາກນັ້ນ ທ່ານເຈົ້າແຂວງໆຊຽງຂວາງກໍ່ໄດ້ສະແດງຄວາມຊົມເຊີຍຕໍ່ການພັດທະນາເສດຖະກິດ-ສັງຄົມທີ່ມີການຂະຫຍາຍຕົວດີຂຶ້ນ ພ້ອມດຽວກັນນີ້ທ່ານຍັງໄດ້ເນັ້ນໜັກໃຫ້ການນຳຫຼັກແຫຼ່ງຂອງເມືອງຈົ່ງສືບຕໍ່ສຶກສາອົບຮົມການເມືອງແນວຄິດໃຫ້ແກ່ພະນັກງານ-ປະຊາຊົນໃຫ້ທົ່ວເຖິງ, ເອົາໃຈໃສ່ເປັນພິເສດຕໍ່ກັບ ວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ແໜ້ນແຟ້ນ, ຊີ້ນຳ-ຊຸກຍູ້ການພັດທະນາ ໂດຍສຸມໃສ່ຫັນເອົາການປູກ-ການລ້ຽງໃຫ້ກາຍເປັນສິນຄ້າສ້າງຄອບຄົວຕົວແບບ, ຍົກສູງບົດບາດ ຂອງພັກຄຸນນະພາບຂອງສະມາຊິກພັກ, ສຸມໃສ່ແກ້ໄຂ ແລະຕ້ານປາກົດການຫຍໍ້ທໍ້ ເປັນເຈົ້າການມີສະຕິຕ້ານກົນອຸບາຍ ຂອງກຸ່ມຄົນທີ່ບໍ່ຫັວງດີ, ສືບຕໍ່ລົງຮາກຖານການເມືອງ, ສູ້ຊົນໃຫ້ບັນລຸ SDG ສຸມໃສ່ພັດທະນາເຮັດໃຫ້ເສດຖະກິດຂະຫຍາຍຕົວຕໍ່ເນື່ອງສົມສ່ວນສີຂຽວ ແລະຍືນຍົງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ