ເຊກອງ-ກວາງນາມ ຫາລືແກ້ໄຂຜູ້ຕັ້ງພູມລຳເນົາຕາມລຳພັງໃຈ

     ອາທິດຜ່ານມານີ້ຄະນະຜູ້ແທນ ແຂວງເຊກອງ ສປປ ລາວ ແລະແຂວງກວາງນາມ ສສ ຫວຽດນາມ ໄດ້ຈັດກອງປະຊຸມປຶກສາຫາລືກ່ຽວກັບວຽກງານ ການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລໍາພັງໃຈ ແລະສ້າງຄອບຄົວບໍ່ຖືກຕ້ອງຕາມລະບຽບກົດໝາຍຢູ່ຕາມບໍລິເວນຊາຍແດນລາວ-ຫວຽດນາມ

ຂຶ້ນທີ່ຫ້ອງປະຊຸມຫ້ອງວ່າການປົກຄອງແຂວງເຊກອງ ໂດຍມີ ທ່ານ ຖາວອນ ພົມມະໄລລຸນ ຮອງເຈົ້າແຂວງໆເຊກອງ, ທ່ານ ເຈິ້ນ ດິ້ງ ຕຸງ ຮອງປະທານຄະນະກໍາມະການປະຊາຊົນແຂວງກວາງນາມ ສສ ຫວຽດນາມ, ມີຄະນະຜູ້ແທນທັງສອງຝ່າຍເຂົ້າຮ່ວມ.

     ການປະຊຸມຄັ້ງນີ້ໄດ້ຄົ້ນຄວ້າ, ແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາ ແລະແຕ່ງດອງບໍ່ຖືກກົດໝາຍຢູ່ຕາມຂົງເຂດຊາຍແດນຂອງສອງແຂວງເຊກອງ-ກວາງນາມ ເພື່ອປຶກສາຫາລືວິທີການຈັດຕັ້ງປະຕິບັດໃຫ້ມີຜົນສໍາເລັດຕາມລະ ດັບຄາດໝາຍທີ່ວາງໄວ້ ແລະທັງເພື່ອ ເປັນການຈັດຕັ້ງຜັນຂະຫຍາຍເນື້ອໃນຂໍ້ຕົກລົງລະຫວ່າງສອງລັດຖະບານລາວ-ຫວຽດນາມທີ່ໄດ້ເຊັນສັນຍາກ່ຽວກັບການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະສ້າງຄອບຄົວບໍ່ຖືກລະບຽບຢູ່ບໍລິເວນຊາຍແດນລາວ-ຫວຽດນາມ ກໍຄືສອງແຂວງເຊກອງ-ກວາງນາມ ໃຫ້ປະກົດຜົນເປັນຈິງ, ພ້ອມທັງເສີມສ້າງສາຍພົວພັນຮ່ວມມືມິດຕະພາບ, ຄວາມສາມັກຄີແບບພິເສດທີ່ເປັນ ມູນເຊື້ອຂອງສອງພັກ-ສອງລັດ ແລະປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະສອງແຂວງເຊກອງ-ກວາງນາມໃຫ້ເພີ່ມພູນຄູນສ້າງ ແລະກ້າວຂຶ້ນສູ່ລວງເລິກເລື້ອຍໆ. 

     ການປຶກສາຫາລື ທັງສອງຝ່າຍໄດ້ ຜັດປ່ຽນກັນລາຍງານກ່ຽວກັບສະພາບ ການຈັດຕັ້ງປະຕິບັດຂໍ້ຕົກລົງໃນການ ແກ້ໄຂບັນຫາການຍົກຍ້າຍຕັ້ງພູມລໍາເນົາຕາມລໍາພັງໃຈ ແລະສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນລາວ-ຫວຽດນາມ ກໍຄືສອງແຂວງເຊ ກອງ-ກວາງນາມໃນໄລຍະຜ່ານມາ ແລະປະກອບຄໍາເຫັນໃສ່ຮ່າງບົດບັນທຶກສັນຍາ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າມີລະບົບກົນໄກຄຸ້ມຄອງທີ່ດີຂຶ້ນກວ່າເກົ່າ, ຈາກນັ້ນກໍໄດ້ລົງນາມເຊັນບົດບັນທຶກສອງຝ່າຍ, ຕາງໜ້າຄະນະຜູ້ແທນຝ່າຍແຂວງເຊກອງ ໂດຍທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ແລະຕາງໜ້າຄະນະຜູ້ແທນຝ່າຍແຂວງກວາງນາມໂດຍທ່ານ ເຈິນດິ້ງຕຸງ ຮອງປະທານຄະນະກຳມະການປະຊາຊົນແຂວງກວາງນາມ, ຊຶ່ງມີຄະນະຜູ້ແທນສອງ ຝ່າຍເຂົ້າຮ່ວມເປັນສັກຂີພິຍານ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ