ປະທານພີເອັສ ເອົາຄໍຄໍ້າປະກັນ ຈະສົ່ງເງິນຄືນສະມາຊິກ ຫລັງ 3 ເດືອນ

     ພາຍຫຼັງແຈ້ງ ການເດັດຂາດຈາກທະນາຄານແຫ່ງ ສປປ ລາວ, ບໍລິສັດ ພີເອັສ ກໍຈະມີການຫັນປ່ຽນກົນໄກການຕະຫລາດເພື່ອ ໃຫ້ສອດຄ່ອງກັບກົດໝາຍຂອງກົນໄກການຄ້າ, ໂດຍທີ່ບໍ່ຮັບສະມາຊິກໃໝ່ ແລະຈະຄືນເງິນສະມາຊິກທີ່ຕ້ອງການຖອນທັງໝົດພາຍຫຼັງ 3 ເດືອນຫຼັງຍື່ນສະເໜີຂໍຖອນນັບແຕ່ມື້ນີ້.

 

     ທ່ານນາງ ສຸກນາລີ ເທບສີເມືອງ ປະທານບໍລິສັດ ພີເອັສ ສົ່ງເສີມກະສິກຳ ແລະອຸດສາຫະກຳຄົບວົງຈອນຂາເຂົ້າ-ຂາອອກຈໍາກັດ ໄດ້ກ່າວວ່າ: ຈາກສະພາບການ ຂອງບໍລິສັດ ພີເອັສ ທີ່ສັງຄົມໃນຂອບເຂດທົ່ວປະເທດສົນໃຈ ແລະກໍາລັງບໍ່ເຂົ້າໃຈ ລວມເຖິງສະມາຊິກຂອງພີເອັສ, ດັ່ງນັ້ນ ກ່ຽວກັບບັນຫາການບໍ່ເຂົ້າໃຈນີ້ ຊຶ່ງສົ່ງຜົນກະທົບໂດຍກົງໃຫ້ກັບບໍລິສັດຢ່າງຫຼວງຫຼາຍບໍ່ວ່າຈະເປັນຊື່ສຽງ, ການຈໍາໜ່າຍຜະລິຕະພັນລວມທັງການຖອນເງິນຄືນຂອງສະມາຊິກ ຊຶ່ງຜົນກະທົບຄັ້ງນີ້ ເຮັດໃຫ້ບໍລິສັດເສຍຫາຍຢ່າງໜັກໜ່ວງສະເລ່ຍປະມານ 100 ກວ່າຕື້ກີບ ນັບແຕ່ເດືອນສິງຫາ 2016 ເປັນຕົ້ນມາ ແລະເຮັດໃຫ້ການເຕີບໃຫຍ່ຂອງບໍລິສັດຊ້າລົງປະມານ 5 ປີ ພາຍໃນ 3 ເດືອນ. ຍ້ອນແນວນັ້ນປະທານບໍລິສັດພີເອັສ ຈິ່ງໄດ້ມີການຖະແຫຼງຂ່າວເພື່ອເປີດເຜີຍໃຫ້ສັງຄົມໄດ້ຮັບຮູ້ ແລະເຂົ້າໃຈຫຼາຍຂຶ້ນ.

     ອີງຕາມທິດຊີ້ນໍາຂອງລັດຖະບານ ແລະໃບແຈ້ງການເດັດຂາດຈາກທະນາຄານແຫ່ງ ສປປ ລາວ, ບໍລິສັດ ພີເອັສ ນັບແຕ່ນີ້ຕໍ່ໄປກໍຈະມີການຫັນປ່ຽນກົນໄກການຕະຫຼາດໃໝ່ ເພື່ອໃຫ້ສອດຄ່ອງກັບກົດໝາຍຫຼາຍຂຶ້ນ, ເຮັດສັງຄົມເຂົ້າໃຈ ແລະໄດ້ຄວາມໂປ່ງໃສຕໍ່ບໍລິສັດ, ໂດຍມີການຍຸດຕິບໍ່ຮັບສະມາຊິກໃໝ່ເຂົ້າມາ, ພ້ອມທັງປະຕິບັດຕາມໃບແຈ້ງການຂອງທະນາຄານ, ສ່ວນສະມາຊິກເກົ່າພາກສ່ວນໜຶ່ງກໍມີການຖອນອອກໄປແລ້ວຈໍານວນຫຼາຍຈາກສະມາຊິກໃນເບື້ອງຕົ້ນ 2 ແສນຄົນ ຊຶ່ງໃນປະຈຸບັນຈາກບົດລາຍງານແລ້ວສຸດທີໄດ້ສົ່ງໃຫ້ທະນາຄານ ແລະກະຊວງກະສິກໍາ ແລະການຄ້າແມ່ນຍັງເຫຼືອ 25 ພັນກວ່າຄົນ ໃນຂອບເຂດທົ່ວປະເທດ.

     ສໍາລັບລູກຄ້າທີ່ຍັງເຫຼືອໃນປະຈຸບັນ 25 ກວ່າຄົນນັ້ນ ຖ້າຫາກວ່າບໍ່ມີການ ເຊື່ອໝັ້ນຕໍ່ບໍລິສັດ ຫຼື ວ່າຕ້ອງການຖອນກໍສາມາດຖອນໄດ້ ແຕ່ຕ້ອງພາຍຫຼັງ 3 ເດືອນ ຫຼັງຈາກມື້ຍື່ນໃບສະເໜີຂໍຖອນ ແຕ່ຫາກສະມາຊິກຕ້ອງການຖອນກ່ອນກໍານົດ 3 ເດືອນຜູ້ກ່ຽວແມ່ນເອົາສິນຄ້າໄປຈໍາໜ່າຍເອງ.

     ຢ່າງໃດກໍຕາມ ຕໍ່ກັບບັນຫາດັ່ງກ່າວນີ້ ທ່ານປະທານບໍລິສັດ ຢັ້ງຢືນພ້ອມເອົາຄໍເປັນປະກັນວ່າ: ພີເອັສ ຈະບໍ່ມີການລົ້ມລະລາຍ ແລະມີເງີນຄືນພຽງພໍໃຫ້ສະມາຊິກແນ່ນອນ. ເນື່ອງຈາກວ່າ ປະຈຸບັນບໍລິສັດ ພີເອັສ ມີເຄື່ອງຜະລິດນ້ຳເປັນສິນຄ້າໃຫ້ກາຍເປັນເງິນຢູ່ 8 ເຄື່ອງ ໃນນັ້ນ: ຂະໜາດ 1500 ມລ 1 ເຄື່ອງ, ຂະໜາດ 600
ມລ 1 ເຄື່ອງ, ຂະໜາດ 350 ມລ 3 ເຄື່ອງ, 250 3 ເຄື່ອງ ເພາະວ່າສິ່ງເຫຼົ່ານັ້ນຈະເຮັດບໍລິສັດມີປັນຍາທີ່ຈະຈ່າຍເງິນໃຫ້ສະມາຊິກດ້ວຍການຈໍາໜ່າຍນໍ້າດື່ມລາວ.

ຄະແນນລາຍການນີ້
(8 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ