ເຈົ້າໜ້າທີ່ຈັບຜູ້ຮັບຈ້າງແລ່ນເຂົ້າຮຽນ

     ພາຍຫຼັງເຈົ້າໜ້າທີ່ຕຳ ຫຼວດພະແນກເສດຖະກິດ ປກສ ແຂວງວຽງຈັນ ໄດ້ຮັບແຈ້ງ ຄວາມ ແລະຄຳຮ້ອງຟ້ອງຈາກຜູ້ຖືກເສຍຫາຍຈຳນວນ 8 ຄົນ ໃນຄັ້ງວັນທີ 12 ຕຸລາ 2016 ຜ່ານມາວ່າ: ມີນາງ ວອນແສງ ອາຍຸ 60 ປີ ປະຊາຊົນບ້ານນໍ້າແຈ້ງ ເມືອງໂພນໂຮງ ແຂວງວຽງຈັນ

ໄດ້ຮັບແລ່ນເອກະສານເອົາຄົນເຂົ້າຮຽນຢູ່ໂຮງຮຽນຊົນເຜົ່າເດັກກຳພ້າຫຼັກ 67 ພ້ອມທັງສໍ້ໂກງຊັບພົນລະເມືອງລວມມູນຄ່າເສຍຫາຍ 100 ກວ່າລ້ານກີບ ຈາກນັ້ນເຈົ້າໜ້າທີ່ ຈຶ່ງລົງໄປເກັບກຳຂໍ້ມູນຫຼັກຖານຕົວຈິງນຳຜູ້ຖືກຫາເຫັນວ່າມີມູນຄວາມຈິງຈຶ່ງໄດ້ກັກຕົວນາງ ວອນແສງ ຄັ້ງວັນທີ 18 ຕຸລາ 2016 ມາສືບສວນ-ສອບສວນ.

     ຜ່ານການສຶບສວນ-ສອບສວນຂອງ ເຈົ້າໜ້າທີ່ຕໍາຫຼວດເສດຖະກິດ ປກສ ແຂວງວຽງຈັນ ນາງ ວອນແສງ ໄດ້ຮັບສາລະພາບວ່າ:ໃນເບື້ອງຕົ້ນນັບແຕ່ປີ 2015 ນາງ ວອນແສງ ແມ່ນໄດ້ເຄື່ອນ ໄຫວເລີ່ມຮັບແລ່ນເອກະສານເອົາຄົນເຂົ້າຮຽນຢູ່ໂຮງຮຽນຊົນເຜົ່າເດັກກຳພ້າຫຼັກ 67 ມາຮອດປີ 2016 ໄດ້ມີພວກຖືກເສຍຫາຍ 8 ຄົນ ຈາກແຂວງບໍລິຄຳໄຊ ມາຫານາງ ວອນແສງ ເພື່ອໃຫ້ຜູ້ກ່ຽວແລ່ນເອກະສານເອົາຄົນເຂົ້າຮຽນຜູ້ກ່ຽວແມ່ນໄດ້ຮັບປາກວ່າຈະແລ່ນໃຫ້ບໍ່ໃຫ້ມີບັນຫາໄດ້ແນ່ນອນ ເພາະຮູ້ຈັກຮັກແພງກັບຜູ້ໃຫຍ່ທີ່ສາມາດເອົາຄົນເຂົ້າຮຽນໄດ້ ຈາກນັ້ນນາງ ວອນແສງ ໄດ້ສະເໜີ ເງື່ອນໄຂໃນການແລ່ນເອກະສານໂດຍໃຫ້ຈ່າຍກ່ອນເຄິ່ງໜຶ່ງ ຖ້າໄດ້ເຂົ້າຮຽນແລ້ວຈຶ່ງຈ່າຍສ່ວນທີ່ເຫຼືອຕົກມາຮອດ 12 ຕຸລາ 2016 ພວກຖືກເສຍຫາຍຈຶ່ງຮູ້ວ່າຄົນທີ່ໄປຝາກແລ່ນເອກະສານນັ້ນບໍ່ໄດ້ເຂົ້າຮຽນຕາມທີ່ຕົກລົງກັນໄວ້ ຜູ້ກ່ຽວ ແມ່ນເຈດຕະນາສໍ້ໂກງຊັບຂອງພົນລະເມືອງຢ່າງແທ້ຈິງຜູ້ກ່ຽວແມ່ນໃຊ້ເລ່ລ່ຽມຕົວະຍົວະຫຼອກລວງເຮັດໃຫ້ຜູ້ອື່ນເຊື່ອໃຈ ໂດຍແອບອ້າງບຸກຄົນທີ່ມີບົດບາດ ແລະມີຖານະຕຳແໜ່ງວ່າຮັກແພງກັບຜູ້ກ່ຽວ, ລື້ງເຄີຍ ແລະສາມາດຊ່ວຍເອົາຄົນເຂົ້າຮຽນຢູ່ໂຮງຮຽນຊົນເຜົ່າເດັກກຳພ້າຫຼັກ 67 ໄດ້ ແຕ່ຕ້ອງຈ່າຍ ເງິນກ່ອນເຄິ່ງໜຶ່ງ ສ່ວນຍັງເຫຼຶອພາຍຫຼັງມີລາຍຊື່ເຂົ້າຮຽນແລ້ວຈຶ່ງຈ່າຍຕາມ ຫຼັງຈາກນັ້ນພວກເສຍຫາຍຈຳນວນໜຶຶ່ງ ໄດ້ມອບເງິນໃຫ້ນາງ ວອນແສງ ງວດທີ 1 ເງິນຈຳນວນ 39,55 ລ້ານກີບ, ເງິນບາດໄທ 1,25 ແສນບາດ ພ້ອມກັບເອກະສານທີ່ປະກອບຄົບຊຸດ, ຫຼັງຈາກໄດ້ເງິນ ແລະເອກະສານແລ້ວຜູ້ກ່ຽວບໍ່ໄດ້ແລ່ນເອກະສານຕາມທີ່ຕົກລົງກັນໄວ້ ແລະບໍ່ມີການຕິດຕໍ່ພົວພັນອີກ.

     ຕໍ່ມານາງ ວອນແສງ ແມ່ນໄດ້ສະເໜີເອົາເງິນສ່ວນທີ່ຍັງເຫຼືອຈາກພວກເສຍຫາຍ ເປັນງວດທີ 2 ອີກ ເງິນຈຳນວນ 58,65 ລ້ານກີບ, ເງິນບາດໄທ 30 ພັນບາດ ທັງໆທີ່ນາງ ວອນແສງ ຮູ້ດີວ່າຄົນທີ່ຜູ້ກ່ຽວໄປແລ່ນເອກະສານໃຫ້ນັ້ນແມ່ນບໍ່ມີລາຍຊື່ເຂົ້າຮຽນ ແຕ່ກໍ່ຍັງຕົວະໃຫ້ພວກຖືກເສຍເອົາເງິນມາຈ່າຍໃຫ້ຜູ້ກ່ຽວ ໂດຍອ້າງວ່າຈະເອົາເງິນຈຳນວນດັ່ງກ່າວໄປຊຸກຍູ້ໃຫ້ຜູ້ມີຖານະຕຳແໜ່ງອີກ ພວກຖືກເສຍຫາຍຈຶ່ງຫຼົງເຊື່ອ ຈຶ່ງຍອມມອບເງິນໃຫ້ຜູ້ກ່ຽວຕື່ມອີກ, ຕໍ່ກັບການກະທຳຂອງນາງ ວອນແສງ ເປັນການກະທຳຜິດ ຕໍ່ກົດໜາຍອາຍາແຫ່ງ ສປປ ລາວ ໃນມາດຕາ 120 ການສໍ້ໂກງຊັບພົນລະເມືອງ

     ປະຈຸບັນທາງເຈົ້າໜ້າທີ່ຕຳຫຼວດ ເສດຖະກິດ ປກສ ແຂວງວຽງຈັນ ໄດ້ສະຫຼຸບສຳນວນຄະດີ ແລະໄດ້ດຳເນີນຄະດີຕາມລະບຽບກົດໜາຍໃນຂັ້ນຕໍ່ໄປ.

 

ຄະແນນລາຍການນີ້
(4 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ