ຊຸດຊົນເຜົ່າກຶມມຸ ທຸລະກິດເພື່ອພໍ່

     ດັ່ງທີ່ຮູ້ນຳກັນແລ້ວວ່າລາວເຮົາເປັນປະເທດໜຶ່ງທີ່ມີຫຼາຍຊົນຊາດຊົນເຜົ່າ ນັບແຕ່ເໜືອຕະຫຼອດໃຕ້, ແຕ່ປະຈຸບັນວັດທະນະທຳບາງຊົນຊາດຊົນເຜົ່າ ກໍເລີ່ມສູນຫາຍໄປຍ້ອນຂາດການສຶບທອດຈາກຄົນຮຸ້ນໃໝ່ ແລະການເຊື່ອມສານຂອງວັດທະນະທຳຫຼາຍເຊື້ອຊາດ

ໃນເວລາດຽວກັນເຄື່ອງນຸ່ງຂອງຖືຂອງຊົນເຜົ່າ ຖ້າໄດ້ຮັບການຍົກສູງຍັງສາມາດສ້າງໃຫ້ເປັນທຸລະກິດໄດ້ທັງມີຕະຫຼາດຈຳໜ່າຍທີ່ຍາວນານອີກດ້ວຍ.

     ທ່ານນາງ ວຽງຄອນ ສິດສຸວົງ ຜູ້ອຳນວຍການບໍລິສັດພັດທະນາສາມຫຼ່ຽມເສດຖະກິດຄົບວົງຈອນ ຈຳກັດໃຫ້ສຳພາດເມື່ອບໍ່ດົນມານີ້ຮູ້ວ່າ: ຮ້ານຫັດຖະກຳຊຸດຊົນເຜົ່າກຶມມຸສ້າງຂຶ້ນເພື່ອເປັນການສົ່ງເສີມ, ອະນຸລັກຮັກສາຮີດຄອງປະເພນີການນຸ່ງຖືຊຸດຊົນເຜົ່າໄວ້ໃຫ້ຄົນຮຸ້ນຫຼັງໄດ້ຮູ້, ທັງເປັນການສືບສານເຈຕະນາລົມຂອງຜູ້ເປັນພໍ່, ຊຶ່ງກໍເປັນຄົນຊົນເຜົ່າກຶມມຸ ໂດຍພໍ່ເປັນແຮງບັນດານໃຈທີ່ສຳຄັນໃນການສ້າງທຸລະກິດຕັ້ງແຕ່ຄາວຍັງນ້ອຍພຸ້ນ, ໂດຍພໍ່ຈະສອນ ຕະຫຼອດວ່າເປັນຄົນລາວຊົນຊາດລາວຊົນເຜົ່າໃດຕ້ອງໄດ້ມີການຮັກສາຮີດຄອງປະເພນີໄວ້ ເພາະຖ້າເຮົາຍັງບໍ່ຮັກສາແລ້ວຕໍ່ໄປຮຸ້ນລູກຮຸ້ນຫຼານທີ່ເຕີບໃຫຍ່ຂຶ້ນມາເຂົາເຈົ້າຈະບໍ່ມີໂອກາດໄດ້ເຫັນຮີດຄອງປະເພນີດັ່ງກ່າວ ເພາະມັນຈະສູນ ຫາຍໄປເທື່ອລະໜ້ອຍ.

     ໃນເບື້ອງຕົ້ນການຕັດຊຸດ ແລະປັກແຊ່ວຊຸດຊົນເຜົ່າກຶມມຸນີ້ ແມ່ນບໍ່ໄດ້ຜົນກຳໄລແຕ່ຢ່າງໃດພຽງແຕ່ຊື້ຜ້າແພ ເພື່ອມາຕັດເປັນຊຸດໃຫ້ກັບຍາດພີ່ນ້ອງນຸ່ງຕາມງານສຳຄັນຕ່າງໆເຊັ່ນ: ບຸນກິນຈຽງຂອງເຜົ່າກືມມຸ, ຊຶ່ງຖືເປັນປະເພນີໜຶ່ງທີ່ມີການແຈກເຄື່ອງນຸ່ງ ແລະພຽງແຕ່ຢາກເຜີຍແຜ່, ອານຸລັກຮັກສາ ແລະປົກປັກຮັກສາຮີດຄອງປະເພນີການນຸ່ງຖືອັນມີເອກະລັກ ແລະຄວາມສວຍສົດງົດງາມຂອງຊົນເຜົ່າກຶມມຸເພື່ອໃຫ້ຄົນລາວ ແລະຄົນຕ່າງປະເທດໄດ້ເຫັນຮີດຄອງປະເພນີ, ພາຍຫຼັງເຮັດໄປໄລຍະໜຶ່ງສັງຄົມ ກໍເລີ່ມໃຫ້ຄວາມສົນໃຈກ່ຽວກັບຊຸດຊົນເຜົ່າຫຼາຍຂຶ້ນ ຈິ່ງເຮັດໃຫ້ເພີ່ນຫັນມາສົ່ງເສີມກ່ຽວກັບວັດທະນະທຳຊຸດຊົນເຜົ່າຈົນກາຍເປັນທຸລະກິດເທົ່າທຸກວັນນີ້.

     ທ່ານນາງ ວຽງຄອນ ສິດສຸວົງ ໃຫ້ຮູ້ຕື່ມວ່າ: ປະຈຸບັນການຈຳໜ່າຍຫັດຖະກຳຊົນເຜົ່າກຶມມຸກາຍເປັນຂະແໜງການທຸລະກິດໜຶ່ງທີ່ມີການລົງທຶນແບບຍືນຍົງ ແລະລັດຖະບານ ກໍມີນະໂຍບາຍໃນການສົ່ງເສີມ, ເພາະເຫັນວ່າປະເທດລາວເປັນປະເທດທີ່ມີຄວາມອຸດົມສົມບູນທາງດ້ານທຳມະຊາດ, ຮີດຄອງປະເພນີ ແລະຍັງມີທີວທັດທຳມະຊາດທີ່ສວຍງາມທີ່ຊາວຕ່າງຊາດມີຄວາມສົນໃຈຢາກມາສຳພັດ ແລະທ່ຽວຊົມ, ຄວບຄູ່ກັບການໄດ້ເຫັນໄດ້ຊົມການນຸ່ງຖືຂອງເຜົ່າໄປພ້ອມໆກັນ.

     ຢ່າງໃດກໍຕາມເຖິງວ່າປະຈຸບັນຫັດຖະກຳຊຸດຊົນເຜົ່າທີ່ບໍລິສັດດຳເນີນຢູ່ຈຸດໜັກແມ່ນຈະເນັ້ນການຈຳໜ່າຍແບບສົ່ງໃຫ້ກັບບັນດາແຂວງຕ່າງໆເປັນຕົ້ນອຸດົມໄຊ, ຫຼວງນ້ຳທາ ແລະຜົ້ງສາລີ, ແຂວງວຽງຈັນ ແລະຄຳມ່ວນ, ຊຶ່ງຄາດວ່າໃນອະນາຄົດຫັດຖະກຳຊຸດຊົນເຜົ່າກຶມມຸ ຈຳພວກເສື້ອ, ສີ້ນ, ໂສ້ງ ແລະຜ້າຄຽນຫົວ ຈະເປັນທີ່ຮູ້ຈັກຂອງຄົນພາຍໃນ ແລະຕ່າງປະເທດບໍ່ຫຼາຍກ່ໍໜ້ອຍ, ເນື່ອງຈາກວ່າໃນດຽວນີ້ ທາງບໍລິສັດໄດ້ອອກແບບເພີ່ມໃຫ້ມີທັງຊຸດດັ້ງເດີມ ແລະຊຸດປະຍຸກໃຫ້ໃຊ້ໄດ້ໃນຫຼາຍໂອກາດ, ຄຽງຄູ່ກັນນັ້ນ ຍັງຈະຜະລິດເຄື່ອງໃຊ້ສອຍທີ່ໃຊ້ໄດ້ໃນຊີວິດປະຈຳວັນ ເພື່ອເພີ່ມທາງເລືອກໃໝ່ໃຫ້ລູກຄ້າເປັນຕົ້ນປະເພດແຜ່ນຮອງຈອກກັບໃສ່ເຈ້ຍທິບຊູ ແລະອື່ນໆ, ສ່ວນລູກຄ້າ ທ່ານໃດສົນໃຈຢາກເປັນຕົວແທນຈຳໜ່າຍ ຫຼື ຢາກໄດ້ສິນຄ້າໄປໃຊ້ເອງກໍສາມາດແວະໄປໄດ້ ໂດຍຮ້ານຈະຕັ້ງຢູ່ບ້ານພະຂາວ, ເມືອງໄຊທານີ ນະຄອນຫຼວງວຽງຈັນ ໂທ 020 55495545; 020 56255051.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ກັນຍາ 2017 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

ຄຳເຫັນຜູ້ອ່ານ

ໄປເທິງສຸດ