ນ້ຳປະປາ ນວ ມອບພັນທະເຂົ້າງົບແລ້ວ 22,74 ຕື້ກີບ

     ລັດວິສາຫະກິດນໍ້າປະປານະຄອນຫຼວງວຽງຈັນ (ນວ) ແມ່ນວິສາຫະກິດຂອງລັດທີ່ດຳເນີນທຸລະກິດຕາງໜ້າລັດຖະບານມີບົດບາດກາຍເປັນກຳລັງແຮງອັນສຳຄັນໃນການພັດທະນາ ຊຶ່ງເປັນສ່ວນໜຶ່ງໃນການຊຸກຍູ້ຂັບເຂື່ອນເສດຖະກິດ-ສັງຄົມຂອງປະເທດເວົ້າສະເພາະກໍຄື ນວ ມີບາດກ້າວຂະຫຍາຍຕົວຕໍ່ເນື່ອງໃນທ່າອ່ຽງນັບມື້ດີຂຶ້ນ,

ທັງເປັນໜ່ວຍງານສໍາຄັນໃນການບໍລິການນໍ້າສະອາດໃຫ້ສັງຄົມໄດ້ຊົມ ໃຊ້ເຂົ້າໃນຊີວິດປະຈຳວັນຢ່າງທົ່ວເຖິງ ໂດຍໃນສົກປີ 2015-2016 ຜ່ານມາເຫັນວ່າລັດວິສາຫະກິດນໍ້າປະປາ ນວ ໄດ້ມອບພັນທະເຂົ້າງົບປະມານຂອງລັດແລ້ວ 22,74 ຕື້ກີບ.

     ທ່ານ ຄຳເຜີຍ ວົງສາຄຳຜຸຍ ອຳນວຍການລັດວິສາຫະກິດນໍ້າປະປາ ນວ ກ່າວໃນກອງປະຊຸມສະຫຼຸບຜົນງານປະຈໍາປີ 2016 ແລະແຜນປີ 2017 ບໍ່ດົນມານີ້ໃຫ້ຮູ້ວ່າ: ປະຈຸບັນລັດວິສາຫະກິດນໍ້າປະປາ ນວ ໄດ້ມີການເຕີບໃຫຍ່ຂະຫຍາຍຕົວ ຢ່າງຕໍ່ເນື່ອງ, ສາມາດຕອບສະໜອງນໍ້າປະປາໄດ້ 2,80 ແສນ ແມັດກ້ອນຕໍ່ມື້ ແລະຈະເພີ່ມເປັນ 3,40 ແສນແມັດກ້ອນຕໍ່ມື້ໃນທ້າຍ ປີ 2017 ປະຈຸບັນທົ່ວ ນວ ມີປະຊາຊົນຊົມໃຊ້ຫຼາຍກວ່າ 8 ແສນຄົນ, ມີໝໍ້ແທກນໍ້າຫຼາຍກ່ວາ 1,20 ແສນກົງເຕີ ກວມເອົາປະມານ 85% ຂອງເຂດບໍລິການລະບົບນໍ້າປະປາ ໂດຍໄດ້ກໍານົດຜູ້ຊົມໃຊ້ນໍ້າອອກເປັນ 3 ປະເພດຄື: ຜູ້ຊົມໃຊ້ ທົ່ວໄປແຕ່ 1-10 ແມັດກ້ອນຈະຄິດ ໄລ່ຄ່ານໍ້າ 1.434 ກີບຕໍ່ແມັດກ້ອນ, 11-50 ແມັດກ້ອນແມ່ນ 1.986 ກີບຕໍ່ແມັດກ້ອນ, ແຕ່ 31-50 ແມັດກ້ອນຈະຄິດໄລ່ 2.538 ກີບຕໍ່ ແມັດກ້ອນ ແລະແຕ່ 51 ແມັດກ້ອນ ຂຶ້ນໄປແມ່ນຈະຄິດໄລ່ 3.089 ກີບ ຕໍ່ແມັດກ້ອນ, ສ່ວນປະເພດອົງການລັດ, ສະຖານທູດ ແລະອົງການຈັດຕັ້ງສາກົນຈະຄິດໄລ່ 2.538    ກີບຕໍ່ແມັດກ້ອນ ແລະພາກສ່ວນທຸລະກິດບໍລິການເປັນຕົ້ນແມ່ນໂຮງແຮມ, ຮ້ານອາຫານ, ໂຮງງານຜະລິດນໍ້າກ້ອນ, ນໍ້າດື່ມຈະຄິດໄລ່ 3.089  ກີບຕໍ່ແມັດກ້ອນ.

     ດ້ານການຊໍາລະຄ່ານໍ້າປະປາ ກ່ອນປີ 2000 ຄືນຫຼັງໃນການຊໍາ ລະເງິນຄ່ານໍ້າປະປາຂອງລູກຄ້າ ແມ່ນຈ່າຍຜ່ານເຄົາເຕີ້ຢູ່ສໍານັກງານ ໃຫຍ່ໂພນເຄັງ ແລະໂອນຜ່ານທະນາຄານ, ມາຮອດປີ 2007 ເພື່ອຄວາມສະດວກໃນການບໍລິການ ແລະຊໍາລະຄ່ານໍ້າປະປາໃຫ້ລູກຄ້າທາງລັດ ວິສາຫະກິດໄດ້ຂະຫຍາຍສາຂາບໍລິການ ແລະຊໍາລະເງິນຢູ່ຕາມສາຂາເມືອງຕ່າງໆເຊັ່ນ: ສາຂາເມືອງ ສີສັດຕະນາກ, ໄຊເສດຖາ, ຈັນທະບູລີ, ສີໂຄດຕະບອງ, ຫາດຊາຍຟອງ, ທ່າເດື່ອ, ໄຊທານີ ແລະທ່າງ່ອນ, ນັບແຕ່ປີ 2012 ມາຮອດປະຈຸບັນນີ້ໄດ້ນໍາໃຊ້ເຕັກໂນໂລ ຊີທີ່ທັນສະໄໝໃຫ້ລູກຄ້າມີຄວາມສະດວກສະບາຍຜ່ານລະບົບອິນເຕີເນັດ ກໍ່ສາມາດຊໍາລະຄ່ານໍ້າປະປາໄດ້ ໂດຍຜ່ານລະບົບທະນາຄານການຄ້າຕ່າງປະເທດ, ທະນາຄານພັດທະນາລາວນອກຈາກນີ້ລູກຄ້າຍັງສາມາດຊໍາລະຄ່ານໍ້າປະປາຜ່ານເຄົາເຕີ້ທະນາຄານສົ່ງເສີມກະສິກໍາ, ທະນາຄານອິນໂດຈີນນໍາອີກ ຊຶ່ງໃນປີ 2016 ລັດວິສາຫະກິດນໍ້າປະປາ ນວ ສາມາດເກັບລາຍຮັບໄດ້ທັງໝົດ 158 ຕື້ກວ່າກີບ, ປະຕິບັດລາຍຈ່າຍໄດ້ 151 ຕື້ກວ່າກີບ ເທົ່າກັບ 90% ແລະມອບພັນທະເຂົ້າງົບປະມານ 22,74 ຕື້ກີບ ປະຕິບັດໄດ້ 91% (ສາເຫດແມ່ນຕິດຕັ້ງບໍ່ໄດ້ຕາມແຜນ ຍ້ອນລະບົບທໍ່ແຈກຍັງບໍ່ທັນທົ່ວເຖິງ).

     ທ່ານ ຄຳເຜີຍ ວົງສາຄຳຜຸຍ ຍັງກ່າວຕື່ມວ່າ: ຜ່ານໄລຍະການເຕີບໃຫຍ່ຂະຫຍາຍຕົວໃນວຽກງານນໍ້າປະປາເວົ້າສະເພາະຢູ່ ນວ ຕະຫຼອດເວລາ 58 ປີ (1959-2017), ໄດ້ມີການພັດທະນາເພີ່ມຂຶ້ນກວ່າ 30-40 ເທົ່າ ຊຶ່ງອັນພົ້ນເດັ່ນແມ່ນ ໃນຊ່ວງແຜນພັດທະນາເສດຖະກິດ-ສັງຄົມ ຄັ້ງທີ VII ຂອງ ນວ ໂດຍສະ ເພາະວຽກງານການຜະລິດ, ການ ບໍລິການ, ແຫຼ່ງລາຍຮັບ ແລະການຫຼຸດຜ່ອນນໍ້າສູນເສຍກໍໄດ້ສູ້ຊົນໃຫ້ ນັບມື້ຫຼຸດລົງເທື່ອລະກ້າວ, ຜົນງານທີ່ພົ້ນເດັ່ນທັງໝົດນັ້ນກໍ່ຍ້ອນມີການຊີ້ນໍາໆພາຂອງຄະນະພັກ, ຄະນະນໍາ ນວ, ກະຊວງ ຍທຂ ແລະອົງການຈັດຕັ້ງລວມເຖິງຜູ້ໃຫ້ທຶນໃນການຊ່ວຍເຫຼືອລ້າເພື່ອພັດທະນາລະບົບນໍ້າປະປາ, ພັດທະນາບຸກຄະລາກອນໃຫ້ມີຄວາມທັນສະໄໝ ແລະເຂັ້ມແຂງເປັນຕົ້ນ: JICA, AFD, ADB, ບັນດາປະດາເທດອາຊຽນ ໂດຍສະເພາະແມ່ນນໍ້າປະປາ Huewaco, BIWASE, ສສ ຫວຽດນາມ, ນໍ້າປະປາພະນົມເປັນ ໃນການເປັນຄູ່ຮ່ວມມືຊ່ວຍເຫຼືອດ້ານວິຊາການຫຼາຍຂົງເຂດ ແລະ ອື່ນໆ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ເມສາ 2017 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
ໄປເທິງສຸດ